Ubushinjacyaha ku Rwego Rwisumbuye rwa Nyarugenge bukurikiranye umukobwa w’imyaka 21 wakubise umugabo w’imyaka 40 akamukura iryinyo ndetse akamuca n’ururimi.
Icyaha akurikiranweho yagikoze ku itariki ya 11 Kanama 2025 mu Mudugudu wa Ryamanyoni, Akagari ka Ruriba, Umurenge wa Kigali, ubwo uregwa yagiranaga amakimbirane n’uwo mugabo bakarwana akamukura iryinyo ndetse akamuca n’ururimi.
Mu ibazwa rye uregwa yemera icyaha akurikiranweho; akemera ko yamurumye ururimi akaruca ariko agahakana ko yamukuye iryinyo nk’uko iyi nkuru dukesha Ubushinjacyaha Bukuru ivuga. Uregwa yasobanuye ko intandaro y’amakimbirane yaturutse ku mibanire ye n’uwo mugabo kuko yari yaramuteye inda ariko nyuma ikaza kuvamo.
Icyaha cyo gukubita cyangwa gukomeretsa kubushake (byatumye umuntu atakaza igice cy’umubiri) ,giteganywa n’ingingo ya 11 y’itegeko no 059/2023 ryo kuwa 04/12/2023 rihindura itegeko no 68/2018 ryo kuwa 30/08/2018 riteganya ibyaha n’ibihano muri rusange.
