Igihugu cya Eritrea cyamaze kwibohora icyorezo cya Covid-19, nyuma y’uko abari bakirwaye bose mu gihugu bamaze gukira 100%.
Itangazo Minisiteri y’ubuzima muri Eritrea yasohoye ejo ku wa 15 Gicurasi, rivuga ko abarwayi ba Coronaviruscan 39 bari bagaragaye muri iki gihugu bose bamaze gukira.
Iyi Minisiteri yagize iti” Umurwayi umwe wari usigaye yakize neza nyuma yo gusuzumwa uko bikwiye na Laboratwari y’igihugu ndetse akaba yasezerewe mu bitaro uyu munsi. Ibi bisubizo bisobanuye ko mangingo aya abarwayi bose 39 bari bagaragaye mu gihugu bakize neza.”
Iyi Minisiteri yavuze ko n’ubwo iki gihugu cyateye intambwe ikomeye yo kwigobotora Covid-19, abaturage bacyo badakwiye kwirara ngo batezuke ku gukomeza kubahiriza amabwiriza yo kwirinda Covid-19 yashyizweho, kugeza igihe bizatangarizwa ko icyorezo cyacitse burundu mu gihugu.
Eritrea yabaye igihugu cya gatatu cya Afurika gitangaje ko abarwayi bacyo bose ba Covid-19 bakize, nyuma ya Maurtania n’ibirwa bya Maurice.
Iki gihugu kandi kiri muri bike byo ku mugabane wa Afurika bitaragaragaramo umuntu wishwe na Covid-19, nyuma y’ibihugu nka Madagascar, Repubulika ya Centrafrica, Mozambique, Namibia, Seychelles, Lesotho, u Rwanda na Uganda.
