Inyeshyamba 35 z’Abatwa zashyize intwaro hasi, zishyikiriza abayobozi bo mu gace ka Muhuyu ho muri Teritwari ya Nyunzu, mu ntara ya Tanganyika iherereye mu Majyepfo ya Repubulika Iharanira Demokarasi ya Congo.
Izi nyeshyamba zafashe icyemezo cyo gushyira intwaro hasi ku wa gatanu tariki ya 21 Gicurasi, ziyemeza guhuza imbaraga n’abari kurwana no kugarura amahoro muri Nyunzu.
Amakuru avuga ko mbere yo gutangaza ko zishyize intwaro hasi zabanje gushyikiriza igisirikare cya Repubulika Iharanira Demokarasi ya Congo intwaro gakondo zarwanishaga, ziganjemo imiheto n’imyambi.
Umuyobozi wa Territoire ya Nyunzu, Hubert Kanza Vumba, yemereye Radiyo Okapi ko amakuru yo gushyira intwaro hasi kwa ziriya nyeshyamba z’Abatwa ari impamo.
Abagize akanama gashinzwe umutekano muri Nyunzu, cyo kimwe n’abahagarariye amatsinda atatu ahuza ibikorwa by’imiryango itegamiye kuri Leta, bakirije yombi icyemezo inyeshyamba zafashe, banahamagarira abandi barwanyi gukurikiza urugero rwazo rwo kwishyira mu maboko y’ubuyobozi.
Inyeshyamba z’Abatwa n’iza Mai-Mai ni zimwe mu zikunze kuvugwaho ibikorwa byibasira abasivili batuye mu bice bimwe na bimwe by’intara ya Tanganyika, ibitero byazo bikaba bikunze kugwamo abaturage benshi, ndetse n’matungo yabo akanyagwa.
Igikorwa cy’urugomo cya hafi ziheruka gukora, ni icyabaye ku wa mbere tariki ya 18 Gicurasi, ubwo zagabaga igitero mu giturage cya Munena, muri territoire ya Nyunzu, zikica abantu babiri na ho abandi batandatu zikabakomeretsa.
