Myugariro Irambona Gisa Eric wari umaze imyaka igera ku munani akinira ikipe ya Rayon Sports, yamaze gutandukana na yo yerekeza muri mukeba wayo, Kiyovu Sports.
Uyu musore ukina inyuma ku ruhande rw’ibumoso wari usanzwe ari Visi-Kapiteni wa Rayon Sports, yasinye amasezerano y’imyaka ibiri muri Kiyovu Sports.
Ni umwe mu bakinnyi bakuru Rayon Sports yari ifite, n’ubwo atabonaga umwanya wo gukina kubera Eric Rutanga.
Yinjiye muri Kiyovu Sports asangamo rutahizamu Samson Babuwa iyi kipe iheruka gusinyisha amasezerano y’umwaka umwe imukuye muri Sunrise.
Kiyovu Sports kandi yaherukaga kongerera amasezerano y’imyaka ibiri Serumogo Ally na Ishimwe Saleh.
Amakuru avuga ko iyi kipe ishobora no gutwara Kimenyi Yves wari umaze umwaka akinira Rayon Sports, mu gihe ibiganiro impande zombi zimazemo iminsi byaba bigenze neza.
Irambona Gisa Éric yari umukinnyi wa Rayon Sports kuva muri 2013. Mu myaka yari amaze ayikinira, yatwaranye na yo ibikombe bitandukanye, birimo bibiri bya Shampiyona. Ni umwe kandi mu bari bagize Rayon Sports yageze muri 1/4 cy’irangiza muri CAF Confederations Cup mu myaka ibiri ishize.
