Umugabo witwa Charles Mwenda yabaze inkuru y’akababaro y’ukuntu abapolisi muri Kenya bamuhatirije kurarana n’umurambo w’umugore we, munsi y’ikamyo iruhande rw’umuhanda mu gace ka Meru.
Ubusanzwe Mwenda yari yarasuhutse, yaragiye gupagasa ahitwa Milindi mu ntara ya Kilifi. Ku wa Gatatu tariki ya 27 Gicurasi, yajyanye umurambo w’umugore we wari wapfuye, agiye kuwushyingura iwabo kavukire mu gace kitwa Tigania muri Meru.
Icyo gihe Mwenda na bamwe bagize umuryango we bari batwaye umurambo w’umugore we mu modoka. Tariki ya 28 bwije, binjiye muri Meru, abapolisi barabahagaritse, birengagiza uruhushya ubuyobozi bwari bwabahaye ngo bajye gushyingura.
Abapolisi bategetse abandi bagize uyu muryango gusubira muri Milindi, Mwenda asigara wenyine n’umurambo w’umugore we ari kumwe n’abapolisi. Imodoka yabazanye, yasubijeyo abategetswe gusubira muri Milindi.
Polisi yari yategetse ko isanduku irimo umurambo ishyirwa hasi, irangije itegeka Mwenda kuyisunikira munsi y’ikamyo yari iruhande ku muhanda, maze Mwenda ategekwa kurarana na yo.
Ati: “Ninginze abapolisi kugira ngo bamfashe bangereze umurambo mu rugo (mu bilometero bitanu uvuye kuri sitasiyo) ariko barabyanze, bantegeka kurarana na wo ijoro ryose kandi imvura yaragwaga.”
Saa kumi n’ebyiri z’igitondo tariki ya 29 Gicurasi 2020, ni bwo incuti ya Mwenda yageze aho yari yarajwe n’abapolisi, maze imufasha gutwara umurambo mu rugo.
