Minisiteri y’Ubuzima mu Rwanda kuri uyu wa 4 Kamena 2020 yatangaje mu Karere ka Rusizi habonetsemo abandi bantu 13 banduye icyorezo cya Covi-19 mu bipimo 1369 byafashwe.
Abakize iki cyorezo bageze kuri 280 barimo 9 b’uyu munsi.
Abarwayi banduye bashyizwe mu kato n’abo bahuye bahise bakurikiranwa.
Akarere ka Rusizi kugarijwe n’iki cyorezo muri uku kwezi kuko guhera tariki ya 1 Kamena 2020, Minisiteri y’Ubuzima yatangaje ko abarwayi bashya 7 bakoze ingendo zambukiranya imipaka, cyane cyane i Rusizi .
Tariki ya 2 ntabwo byigeze bitangazwa niba abarwayi bashya 7 babonetse harimo abo muri aka karere, tariki ya 3 iyi Minisiteri yatangaje ko Rusizi yabonetsemo abanduye 13, biba bityo no kuri uyu wa 4 Kamena.
Muri rusange abamaze kugaragaraho iki cyorezo muri iki gihugu ni 410, abantu 128 ni bo bakirwaye. Abishwe nacyo ni babiri barimo umushoferi w’imyaka 65 y’amavuko n’umupolisikazi w’imyaka 24 y’amavuko.
