Abashinwa 400 basabye Guverinoma ya Kenya uburenganzira bwo gusubira iwabo kubera ko batizeye urwego rw’ubuvuzi rwaho rwashobora guhangana n’icyorezo cya Covid-19 kiri gufata indi ntera.
Aba Bashinwa bifashishije umunyamategeko Isaac Okinyo, bagiye gusaba uruhusha rwihariye mu Rukiko Rukuru rwa Kenya. Mu mpamvu bitwaje nk’uko Okinyo abivuga harimo ko “bafite amahirwe yo kwitabwaho neza mu gihe bari iwabo, mu gihe muri Kenya ho nta bikorwaremezo n’ibikoresho bihagije byo gufasha abarwaye Covid-19.”
Uyu munyamategeko yakomeje avuga ko ahagenewe abashyirwa mu kato hamaze kuzura, uburyo bwo gupima abakekwaho iki cyorezo ndetse no gutahura abafite ibimenyetso byacyo nabwo bugoranye.
Urukiko Rukuru rwamaze guha aba Bashinwa uruhushya rwo gusubira iwabo, ubu bakaba bategereje uburenganzira bwa Minisiteri y’Ububanyi n’Amahanga, mu gihe izaba imaze kububaha, Ambasade yabo izabafasha kuva muri Kenya, bajya mu Bushinwa.
Icyorezo cya Covid-19 cyagaragaye bwa mbere mu Bushinwa mu mpera z’umwaka w’2019. Imibare yakomeje kuzamuka kugeza muri Gashyantare 2020, ubwo abanduye babarirwaga mu 80,000. Gusa iki gihugu cyakomeje guhangana nacyo kugeza ubwo cyabaye nk’igicitse burundu.
Muri Kenya, abantu bamaze kugaragaraho iki cyorezo ni 3305 barimo 90 bashya babonetse kuri uyu wa 12 Kamena 2020 nk’uko byemejwe na Minisiteri y’Ubuzima yaho. Ibipimo bimaze gufatwa muri rusange ni 108,666.
