Abaturage bo muri Malawi mu gitondo cy’uyu wa 23 Kamena 2020 bazindukiye mu matora y’Umukuru w’Igihugu nyuma y’ayo bari barakoze mu 2019 ntibumvikane ku byavuyemo.
Tariki ya 21 Gicurasi 2019, Malawi yabayemo amatora y’Umukuru w’Igihugu, Perezida Peter Mutharika ayegukana ku majwi 38.57% gusa Urukiko rushinzwe itegekonshinga tariki ya 3 Gashyantare 2020, rwahisemo gutesha agaciro ibyavuyemo nyuma y’aho hatahuwe ibimenyetso by’uko habayemo amanyanga.
Peter Mutharika wari uhagarariye ishyaka rya DPP (Democratic Progressive Party) riri ku butegetsi yaje ku isonga, akurikirwa na Lazarus Chakwera wa MCP (Malawi Congress Party) n’amajwi 35.41%, Saulos Chilima wa UTM (United Transformation Movement) agira 20.24%.
Uru rukiko rwari rwafashe umwanzuro ko amatora aba tariki ya 19 Gicurasi 2020 ntibyashoboka, yimurirwa kuri uyu wa 23 Kamena ariko nabwo hari hakiri impungenge ko ashobora kutaba, akimurirwa kuri tariki ya 2 Nyakanga bitewe n’impamvu zirimo icyorezo cya Covid-19.
Mu minsi mike ishize Guverinoma ya Malawi yari yatangaje ko amafaranga yo gutegura aya matora atari kuboneka, bityo ashobora kutaba ku itariki yari yatangajwe.
Abahatanye muri aya matora ari kuba ni: Peter Mutharika wa DPP, Lazarus Chakwera wa MCP na Peter Dominico wa MMD (Mbakuwaku Movement for Development).
