Umuturage wo muri Tanzania yashyize ahagaragara amashusho avuga ko abaturage bagenzi be bari gupfira mu mazu yabo bazize icyorezo cya Covid-19, mu gihe Magufuli agikomeje gukina umukino avuga ko iki cyorezo gisa n’icyacitse mu gihugu.
Kenyan Post yatangaje inkuru y’uyu muturage tariki ya 20 Kamena ,yavuze ko yari agambiriye kumenyesha Isi ibiri kubera muri Tanzania, byagizee ibanga nk’uko aya makuru yagiye asakara mu minsi yashize. Yagize ati: “Abantu bari gupfira mu mazu nk’imbwa, abakozi bo mu nzego z’ubuzima bakabasosoramo, bakabashyingura mu ibanga.”
Iyi videwo yashyizwe ahagaragara nyuma y’iyo umunyamakuru wa The Independent, Andrew Mwenda yashyize ku rubuga rwa Twitter tariki ya 1 Gicurasi 2020 igaragaza abaganga bashyinguraga uwishwe na Covid-19 mu ijoro, mu gikorwa cyakozwe mu ibanga rikomeye.
Tanzania ni kimwe mu bihugu bitigeze bishyiraho ingamba zikaze zo guhangana na Covid-19 zirimo gahunda ya Guma mu Rugo. Ni igihugu kandi gitangaza gake imibare y’ubwandu, bikavugwa ko n’itangazamakuru ry’imbere mu gihugu ryabujijwe kugira icyo ritangaza kuri iki cyorezo.
Kuva aya makuru yajya hanze, Guverinoma ya Tanzania ntacyo yigeze itangaza keretse kuvuga gake ko imibare yagiye igabanyuka babikesheje amasengesho basenze Imana, nk’uko Perezida Magufuli yakunze kubitangaza.
