Bimwe mu bihugu byo ku mugabane w’Afurika byari byarafashe ingamba zo gukumira ikwirakwira ry’icyorezo cya Coronavirus bimaze gutangaza ko zabyoroheje harimo no kongera gusubukura ingendo z’indege rusange zari zarahagaritswe.
Tariki ya 4 Nyakanga ni bwo u Rwanda rwatangaje ko guhera ku wa 1 Kanama 2020 ibibuga by’indege byo mu Rwanda bizongera gufungurwa bikakira indege zitwara abagenzi mu buryo bwa rusange, hubahirizwa amabwiriza yo kwirinda Covid-19 nk’uko itangazo rya Minisiteri y’Ibikorwaremezo ribivuga.
Kimwe n’u Rwanda, hari ibindi bihugu 17 by’Afurika byamaze gutangaza ko byiteguye gusubukura ingendo mu minsi ya vuba nk’uko Ijwi ry’Amerika ryagaragaje urutonde rwabyo.
Byinshi muri ibi bihugu ni ibigize Umuryango w’ibihugu by’Afurika y’Iburengerazuba (ECOWAS) byose uko ari 15 bikaba byatangaje ko bizasubukura ingendo z’indege tariki 21 Nyakanga 2020 (Benin, Burkina Faso, Cap Verde, Cote d’Ivoire, Gambia, Ghana, Guinea, Guinea Bissau, Liberia, Sierra Leone, Mali, Niger, Nigeria na Togo).
Ibi byiyongeraho Senegal izatangira kwakira indege rusange zitwara abagenzi ku butaka bwayo ku itariki 15 z’uku kwezi, naho Kenya ikaba izazifungura tariki ya 1 Kanama.
Ni mu gihe ibihugu nka Cameroon, Guinea Equatoriale, Zambia na Tanzania byo byamaze gusubukura ubu ingendo z’indege rusange zikaba zikora nta nkomyi.
Kugeza ubu icyorezo cya Coronavirus ku mugabane w’Afurika kimaze kwandurwa n’abantu barenga 415,000 kikaba kimaze kwica abarenga 10,200, naho abagera ku 196,000 bakaba baragikize nk’uko imibare ya OMS ibigaragaza.
