Kuri iki Cyumweru, itariki ya 21 Ukuboza, abategetsi ba Nigeria batangaje irekurwa ry’abanyeshuri 130 mu bari barashimuswe ku itariki ya 21 Ugushyingo.
Ni bamwe mu bana n’abakozi 315 bo mu ishuri ry’Abagatolika rya St Mary bashimuswe n’abantu bitwaje imbunda muri Leta ya Niger, hagati mu majyaruguru y’igihugu.
Mu ntangiriro z’Ukuboza, abandi banyeshuri bagera ku 100 bari barashimuswe mu Gushyingo bari bararekuwe.
Nk’uko umuvugizi wa perezida abitangaza ngo nta n’umwe mu banyeshuri washimuswe ku ya 21 Ugushyingo ubu usigaye inyuma. Ni nyuma y’uko abandi 50 muri bo bari barabashije gutoroka nyuma gato yo gushimutwa.
