Kuri uyu wa Mbere, Komite ishinzwe Ubugenzacyaha mu Burusiya yatangaje ko yatangiye iperereza ku “iyicwa” rya Lt. General Fanil Sarvarov, wari ukuriye ishami rishinzwe amahugurwa mu bakozi bakuru. Abashinzwe iperereza baravuga ko igisasu cyari giteze mu modoka cyahitanye umujenerali mukuru w’u Burusiya mu majyepfo ya Moscow.
Abashinzwe iperereza bashinzwe gusuzuma ibyaha bikomeye, bavuze ko uyu mujenerali yapfuye ubwo igisasu cyaturikiraga munsi y’imodoka ye mu majyepfo y’umurwa mukuru w’u Burusiya nk’uko tubikesha Al Jazeera.
Ibinyamakuru byo mu Burusiya byatangaje ko imodoka yaturikiye muri parikingi ku muhanda wa Yaseneva, umushoferi ari imbere, ahagana mu ma saa moya za mu gitondo ku isaha ya Moscow (04:00 GMT).
Svetlana Petrenko, umuvugizi w’iyo komite yagize ati: “Abashinzwe iperereza barimo gukurikirana inzira nyinshi ku byerekeye ubwo bwicanyi. Imwe muri zo ni uko iki cyaha cyateguwe n’Inzego z’Ubutasi za Ukraine.”
Ukraine yatangaje ko ari yo iri inyuma y’igitero nk’iki cyabaye mu Kuboza 2024. Icyo gihe Lt. Gen. Igor Kirillov, wari umuyobozi w’ingabo zishinzwe intwaro kirimbuzi, iz’ubumara n’iz’ubutabire, yishwe na bombe yari iteze mu kamoto gato ka ‘scooter’ kari hanze y’aho yabaga.
