Umushoramari mu muziki wo muri Nigeria, Ubi Franklin yatangaje ko ikintu yicuza cyane mu icunga ry’amafaranga ari ukuba yarakoze ubukwe, agashoramo umurengera w’amafaranga, atanga n’impamvu zishyigikira ibyo avuga.
Hashize imyaka ine Ubi Franklin akoze ubukwe bw’akataraboneka n’umukinnyi wa filimi, Lilian Esoro. Ubu bukwe bwitabiriwe n’ibyamamare mu muziki w’Afurika birimo: Tekno, Tiwa Savage, Iyanya, 2Face Idibia na Paul Okoye wahoze mu itsinda rya P-Square. Abageni n’ababwitabiriye, bahinduranyije imyenda inshuro enye muri ubu bukwe bumwe.
Ubi mu kiganiro yagiranye n’igitangazamakuru cya Business Today, yagize ati: “Ndatekereza ikosa rikomeye nakoze mu mafaranga ari ayo nakoresheje mu bukwe, kubera ko hari baganzi banjye bari babisobanukiwe bari bambwiye ko ntegura akantu gako, maze tujye mu rugo. Iyo nza kubimenya, nari gukora akantu gatoya kandi gasobanutse kurusha ibyo nakoze.”
Ubu ngubu ngo iyo abonye abakoze ubukwe bw’igitangaza, arabaseka, ati: “Kubera ko ari ibirori bikorwa umunsi umwe gusa, iyo urangiye, nabwo buba burangiye. Bavuga ko ari urwibutso, ariko urabona ko ushobora gukora urwibutso bitabaye ngombwa ko utakaza za miliyari.”
Ubi Franklin na Lilian Esoro batandukanye babyaranye umwana umwe witwa Jayden babyaye tariki ya 17 Nyakanga 2016. Gusa ariko kandi Jayden ni umwana wa kane wa Ubi kuko afite abandi batatu yabyaranye n’undi mugore.
Amafoto y’uko ubukwe bwagenze (Src: My Wedding/Ug.)
