Ikipe ya Manchester United yabuze amahirwe yo kwinjira mu makipe ane ya mbere ku rutonde rwa Shampiyona y’Abongereza, nyuma yo kunganyiriza na Southampton ku kibuga Old Trafford ibitego 2-2.
Hari mu mukino w’umunsi wa 35 wa Shampiyona y’Abongereza Manchester United yasabwaga gutsinda, igahita ifata umwanya wa gatatu ku rutonde rwa shampiyona, nyuma y’uko Chelsea iwuriho na Leicester City ya kane zari zatakaje imikino yazo.
Iminota 90 y’umukino yarangiye ikipe ya Manchester United iri imbere n’ibitego 2-1, gusa kutava ku izima kw’abakinnyi ba Southampton n’umutoza wabo kwatumye mu minota itanu y’inyongera bishyura Manchester United umukino urangira amakipe yombi anganya ibitego 2-2.
Southampton ni yo yafunguye amazamu mbere ibifashijwemo na Stuart Amstrong ku gitego yatsinze ku munota wa 12 w’umukino, Manchester United icyishyura ku munota wa 20 w’umukino ibifashijwemo na Marcus Rashford, nyuma y’iminota itatu Anthony Martial ayitsindira igitego cya kabiri ku mupira yari ahawe na Bruno Fernandes.
Ni igitego cya 50 uyu Mufaransa yatsindaga muri Premier league.
Igice cya kabiri cy’umukino hafi ya cyose cyihariwe na Southampton yarushije Manchester United ku buryo bugaragara. Ukubaka umukino byaranze abasore b’umutoza Ralph Hasenhüttl, byatumye Man United y’umutoza Ole Gunnar Solskjaer isubira inyuma, biba ngombwa ko ikina icungira kuri za Contre-Attaques.
Nta buryo buremereye Man United yigeze ibona mu gice hafi ya cyose cya kabiri cy’umukino, usibye ubwa Martial wasize gato ab’inyuma ba Southampton ateye umupira unyura hejuru y’izamu.
Southampton yo yashoboraga kwishyura ku munota wa 84 ibifashijwemo na Nathan Redmond, gusa ishoti riremereye uyu rutahizamu yateye rishyirwa muri koruneri n’umuzamu David De Gea.
Kera kabaye ku munota wa 96 w’umukino, ni bwo Southampton yishuye ibifashijwemo na Michael Obafemi winjiye mu kibuga asimbura, ku mupira wari uturutse kuri koruneri yari itewe na Jan Bednarek.
Kunganya na Southampton byatumye Manchester United yuzuza imikino 18 yikurikiranya idatsindwa, biyihesha kuguma ku mwanya wa gatanu n’amanota 59 inganya na Leicester City ya kane.
Southampton yo yuzuzaga umukino wa kane wikurikiranya wa Shampiyona y’Abongereza idatsindwa, uyihesha kuguma ku mwanya wa 12 ku rutonde rwa shampiyona n’amanota 45.
