Macron yasabye Amerika na Iran gusubira ku meza y’ibiganiro bwangu

Perezida w’u Bufaransa, Emmanuel Macron, yasabye Leta Zunze Ubumwe za Amerika na Iran gusubukura ibiganiro bwangu, nyuma y’uko ibyo impande zombi zagiranye mu cyumweru gishize ntacyo zashoboye kugeraho.

Macron mu butumwa yanditse ku rubuga rwe rwa X ejo ku wa Kabiri, yavuze ko ubusabe bwe yabugejeje kuri ba Perezida Massoud Pezeshkian wa Iran na Donald Trump wa Amerika baganiriye kuri Telefoni.

Ati: “Basabye isubukurwa ry’ibiganiro byahagaritswe i Islamabad, hagakosorwa ubwumvikane buke, kandi hakirindwa ko habaho kongera kwiyongera k’umwuka mubi.”

Macron yashimangiye ko agahenge kagomba “kubahirizwa cyane n’impande zombi”, kandi kakagera no muri Lebanon hakomeje kugabwa ibitero n’ingabo za Israel.

Perezida w’u Bufaransa kandi yasabye ko inzira ya Hormuz ifungurwa nta “mananiza, imbogamizi cyangwa imisoro” kandi bigakorwa vuba bishoboka kuko ari ingenzi ku mutekano w’ingufu ku isi no mu bwisanzure bwo kugenda mu mazi.

Yunzemo ati: “Muri ibi bihe, ibiganiro bigomba kongera gusubukurwa vuba, bigashyigikirwa n’impande z’ingenzi zirebwa n’ikibazo.”

Biteganyijwe ko ku wa Gatanu w’iki cyumweru u Bufaransa n’u Bwongereza bigomba gutegura inama izaba hifashishijwe ikoranabuhanga, ikazahuza ibihugu bitari mu ntambara mu rwego rwo gutegura ubutumwa bw’ibihugu byinshi bwo kwirwanaho bugamije kugarura umutekano mu mazi ya Hormuz mu gihe umutekano waba ubyemeye.

Usibye Macron, Umunyamabanga Mukuru wa Loni, António Guterres, Perezida Recep Tayyip Erdogan wa Türkiye n’abandi bayobozi bo hirya no hino ku Isi bakomeje gusaba Amerika na Iran guhagarika intambara, ahubwo bagakemura ibibazo bafitanye biciye mu nzira y’ibiganiro.