Icyumweru gishize ni icya 31 muri 53 bizagira umwaka w’2020. Cyatangiye tariki ya 27 Nyakanga kirangira tariki ya 2 Kanama 2020. Abahanga mu by’umuco nyarwanda bemeza ko iki ari icyumweru gitegura icy’umunsi w’Umuganura u Rwanda ruzizihiza tariki ya 7 Kanama 2020.
Iki cyumweru cyaranzwe n’amakuru yihariye muri politiki, mu bukungu, mu mutekano ndetse no mibereho y’abaturage; haba mu Rwanda ndetse no mu mahanga. Inkuru z’ingenzi zakiranze ni izi zikurikira:
Ibigo bitatu bibungabunga umuco, ururimi n’amateka bigiye guhuzwa, bigirwe kimwe
Ni icyemezo cyari cyarafashwe n’Inama y’Abaminisitiri yateranye tariki ya 29 Nyakanga 2019, cyemeza ko Inteko Nyarwanda y’Ururimi n’Umuco (RALC) Ikigo cy’Igihugu cy’Ingoro Ndangamurage n’Ikigo cy’Igihugu gishinzwe Ishyinguranyandiko na Serivisi z’Inkoranyabitabo; bigomba guhuzwa bikaba kimwe.
Tariki ya 28 Nyakanga 2020, Abadepite bashyigikiye iki cyemezo cy’Inama y’Abaminisitiri, bashingiye ku itegeko No. 01/2010 ryo ku wa 29/01/2019 rikuraho itegeko rishyiraho RALC. Impamvu bemeje ishingiro ry’uyu mushinga ni uko ibi bigo bihuje inshingano, bikaba byarakozwe ku mpamvu zirimo gucunga neza umutungo w’igihugu nk’uko Minisitiri w’Abakozi ba leta n’umurimo, Rwanyindo Fanfan yabitangaje.
Imirenge SACCO igiye guhuzwa, igirwe Banki y’Amakoperative
Minisitiri w’Ubucuruzi n’Inganda, Soraya Hakuziyaremye ku wa 30 Nyakanga 2020 yatangarije umutwe wa Sena ko Imirenge SACCO yose iri mu gihugu guhera muri uku kwezi kwa Kanama 2020 igiye guhuzwa, igakora banki yitwa ‘Banki y’Amakoperative’.
Minisitiri Soraya yatangaje ko buri Karere kazaba gafite SACCO imwe, bisobanuye ko mu gihugu hazaba hari amashami 30 angana n’umubare w’uturere tukigize. Aya ni yo azaba akoze banki. Bitarenze mu 2022, iyi banki izaba yaramaze gushyirwaho, ikemure ibibazo by’imicungire mibi yaranze za SACCO, ndetse izaba ifite ikoranabuhanga.
RIB yerekanye abakobwa 4 bishyize ku karubanda bambaye ubusa, ukekwaho kuba inyuma yabyo araraswa
Tariki ya 31 Nyakanga 2020, Urwego rw’Igihugu rw’Ubugenzacyaha (RIB) rweretse itangazamakuru abakobwa bane bari mu kigero kiri hagati y’imyaka 18 na 27, aba bakaba barashyize videwo y’ubwambure bwabo ku rubuga rwa ‘Instagram’. Imbere y’itangazamakuru, basobanuye ko babikoreshejwe n’Umukongomani witwa David Shukuru Mbuyi wabanje kubasindisha, abona kubafata amashusho. Kuri uyu wa 1 Kanama 2020, RIB yatangaje ko uyu musore w’imyaka 25 y’amavuko yarashwe, arapfa ubwo yashakaga gutoroka muri kasho ya Polisi mu murenge wa Nyarugunga yari afungiwemo.
MU MAHANGA
Museveni yahawe amahirwe amuganisha kuyobora Uganda imyaka 40.
Ishyaka rya NRM riri ku butegetsi muri Uganda tariki ya 28 Nyakanga 2020 ryemeje Yoweri Kaguta Museveni nk’umukandida uzariserukira mu matora y’Umukuru w’Igihugu azaba mu 2021. Byatuma uyu musaza yongera amahirwe yo kuyobora indi manda y’imyaka itanu, naramuka atsinze aya matora, yazayobora kugeza ku myaka 40 kuko ubu amaze ku butegetsi imyaka 34.
Tanzania na Kenya bikomeje gufata imyanzuro y’agahimano
Nyuma y’aho Guverinoma ya Kenya idashyize Tanzania mu bihugu byemerewe kugusha indege ku butaka bwayo kuva tariki ya 1 Kanama 2020 ubwo ingendo mpuzamahanga zo mu kirere zari zasubukuwe, na Guverinoma ya Tanzania yafashe icyemezo cyo gukumira indege za Kenya muri ubwo buryo busa n’agahimano.
Ibi byemezo kandi byigeze kuranga ibi bihugu mu mezi make ashize ubwo Kenya yafunze imipaka iyihuza na Tanzania mu rwego rwo gukumira icyorezo cya Covid-19, hadaciye umwanya, na Tanzania yahise ifunga inzira zose zo ku butaka ziyihuza na Kenya.
MU MIKINO
Mu mupira w’amaguru, kuri uyu wa 1 Kanama 2020 ikipe ya Arsenal yegukanye igikombe cy’u Bwongereza (FA Cup) ku nshuro ya 14, ubwo yatsindaga Chelsea ibitego 2 (bya Pierre Emerick Aubameyang) kuri kimwe cya Christian Pulisic. Iyi nsinzi yishimiwe cyane n’abafana b’iyi kipe, by’umwihariko Abanyarwanda yamamariza ubukararugendo muri gahunda ya Visit Rwanda.
Perezida wa Repubulika y’u Rwanda, Paul Kagame usanzwe ari umufana ukomeye wa Arsenal na we yishimiye iyi nsinzi, agaragaza ko n’ubwo iyi kipe yari imaze igihe kinini igaragaza intege nke, nk’abakunzi bayo bakomeje kuyigirira icyizere.
MU MYIDAGADURO
Ingingo ivugwa cyane mu myidagaduro yo mu Rwanda, cyane cyane mu muziki ni ubutumwa bwiganjemo amagambo y’ibishegu, akenshi avuga ibijyanye n’ubusambanyi, bukaba buri kwifashishwa cyane n’abahanzi b’Abanyarwanda nk’iturufu yo gutwara imitima y’abiganjemo urubyiruko.
Ibi bijyana kandi n’indirimbo zibamo amashusho yitwa ‘ay’urukozasoni’, ibyayo byazamurwaga cyane ubwo abakobwa bane bashyize ku karubanda ubwanbure bwabo berekanwaga na RIB. Byatumye bamwe mu Banyarwanda bibaza impamvu abahanzi bamwe bagiye bakomozaho badakurikiranwa nk’uko n’aba bakobwa byagenze.
Inzego zishinzwe kubungabunga umuco zagerageje kuganiriza bamwe mu bahanzi ku bijyanye n’ingaruka mbi z’ubutumwa nk’ubu mu bihangano byabo, gusa birasa n’aho nta cyo byatanze, kuko abenshi bakomeje kubukoresha mu buryo bw’amarenga.
