Mu gihe isi ikomeje gutangarira inkuru z’ibintu biguruka bitazwi (Unidentified Aerial Phenomena – UAP), Leta Zunze Ubumwe za Amerika zatangiye kugaragaza ubushake bwo gusohora amwe mu makuru yari yarabitswe mu ibanga rikomeye.
Ibi byatangiye gukomera mu gihe cy’ubutegetsi bwa Donald Trump, aho bamwe babifata nk’intambwe igana ku “biremwa byo hanze y’isi”, abandi bakabibona nk’igikorwa cya politiki n’umutekano.
UAP si inkuru gusa: Ikibazo cy’umutekano
Mu by’ukuri, impamvu nyamukuru si ukwemeza ko hari ibiremwa byo hanze y’isi (extraterrestrial), ahubwo ni impungenge z’umutekano.
Raporo zasohowe n’inzego zirimo Pentagon zagaragaje ko hari ibintu byabonwe n’abapilote b’indege za gisirikare bidafite ibisobanuro byoroshye.
Inzobere zivuga ko ibyo bishobora kuba ikoranabuhanga rishya ry’ibihugu bihanganye na Amerika, drones zifite ubushobozi budasanzwe cyangwa ibintu bitarasobanuka neza mu bumenyi bwa siyansi.
Impamvu za politiki n’igitutu cya rubanda
Mu myaka ishize, Abanyamerika benshi basabye ko habaho gukorera mu mucyo kuri iyi dosiye. Inteko Ishinga Amategeko (Congress) yashyizeho amategeko asaba inzego z’umutekano gutanga raporo zigaragaza ibyo bazi.
Mu gihe cya Donald Trump, hari amashusho yafashwe n’abapilote yasohotse ku mugaragaro, ndetse inzego za leta zitangira kwemera ko hari ibintu “bidasobanutse” bigomba gusobanurwa.
Ibi byatumye ikibazo cya OVNI kiva mu migani kijya mu rwego rwa politiki n’umutekano.
Gukuraho ibanga ku gipimo: Si byose bishyirwa hanze
Nubwo hari amakuru yatangajwe, si yose yashyizwe hanze. Pentagon ikomeza kuvuga ko hari amakuru atagomba gutangazwa kubera impamvu z’umutekano, ndetse ko hari n’ibice by’ubushakashatsi bikiri mu ibanga.
Ibi byerekana ko bashaka gushyira ibintu mu mucyo, ariko bagakomeza igenzura mu gutanga amakuru make, bagakomeza kubika ay’ingenzi.
Ese koko hari ibiremwa byo hanze y’isi?
Kugeza ubu, nta gihamya yemeza ku mugaragaro ko bihari, nubwo hari ibintu byinshi byagaragaye bikaba bitarasobanurwa neza.
Abahanga mu bya siyansi bavuga ko ari ngombwa gukomeza ubushakashatsi aho guhita bafata imyanzuro idafite gihamya.
Nsoza navuga ko icyemezo cyo gutangaza amwe mu makuru ku bintu bitazwi mu kirere atari ukwemeza ko hari ibiremwa byo hanze y’isi, ahubwo ari igikorwa cya politiki n’umutekano kigamije gusobanura ibintu byateje impungenge.
Ku buyobozi bwa Donald Trump, iyi dosiye yavuye mu mwijima ijya mu mucyo, ariko ntiragera aho ihishura byose.
