Guverinoma ya Guinée-Conakry yakiriye inkunga y’ibikoresho bya gisirikare bigezweho byatanzwe n’u Burusiya, mu rwego rwo gukomeza guteza imbere ubushobozi bw’ingabo zayo no guhangana n’ibibazo by’umutekano bihari.
Ibi bikoresho byashyikirijwe Guinée ku mugaragaro ku wa Gatanu tariki ya 1 Gicurasi 2026, mu muhango wabereye ku kibuga cy’indege cya gisirikare giherereye i Conakry. Ni umuhango wayobowe na Perezida wa Guinée, Gen. Mamadi Doumbouya.
Iyi nkunga igizwe n’ibikoresho bitandukanye birimo imyenda ya gisirikare, za Casques, imyambaro idatoborwa n’amasasu, inkweto za gisirikare, indege zitagira abapilote (drones) zigezweho ndetse n’intwaro zifashishwa mu kurwana no kugenzura ikirere.
Perezidansi ya Guinée yatangaje ko abayobozi bo ku mpande zombi bagaragaje ko iki gikorwa kiri mu rwego rwo “gukomeza ubufatanye bwa gisirikare hagati ya Guinée n’u Burusiya, bugamije kongerera ubushobozi ingabo za Guinée mu kurinda ubusugire bw’igihugu, no kurinda abaturage n’ibyabo.”
Perezida Mamadi Doumbouya yashimangiye ko ibi bikoresho bigiye gufasha ingabo za Guinée kurushaho gukora neza inshingano zazo, anashimangira ko umutekano ari inkingi y’iterambere rirambye.
Ku ruhande rw’u Burusiya, intumwa yihariye ya Perezida Vladimir Putin, yavuze ko igihugu cye gikomeje gushyigikira Guinée mu rwego rwo kubaka igisirikare gikomeye kandi gifite ubushobozi bwo guhangana n’ibibazo by’umutekano biriho muri iki gihe.
Iyi nkunga ije mu gihe Guinée iri mu bikorwa byo kuvugurura no kongerera ubushobozi ingabo zayo, mu rwego rwo guhangana n’imbogamizi z’umutekano no kurushaho kwihaza mu kurinda imbibi zayo.
Nyuma y’uyu muhango, Perezida Mamadi Doumbouya yagiranye ibiganiro byihariye n’intumwa y’u Burusiya, bigamije kurushaho kunoza ubufatanye hagati y’ibihugu byombi, cyane cyane mu bijyanye n’umutekano n’igisirikare.
