Umuyobozi w’ikigo cy’ubutasi bwo hanze cya Amerika, CIA, yasuye Cuba abonana n’ushinzwe ubutasi muri icyo gihugu mu murwa mukuru, Havana, aho yari ajyanye “ubutumwa bwite bwa Perezida Donald Trump”.
John Ratcliffe yagiye Havana nyuma y’uko Washington yemereye Cuba inkunga ya miliyoni 100$ yo kuyifasha koroherwa n’ingaruka z’ibihano Washington n’ubundi yabafatiye.
Perezida Miguel Diaz-Canel wa Cuba we yatangaje ko aho kubaha impano Amerika ikwiye gukuraho gufungira Cuba kugezwaho ibikomoka kuri peteroli.
Umwe mu bategetsi muri CIA yabwiye CBS News ko Amerika yiteguye gukorana na Cuba mu by’umutekano n’ubukungu “mu gihe gusa Cuba yakwemera gukora impinduka zikomeye”.
Mu bakoranye inama n’uyu mukuru wa CIA harimo Raúl Rodríguez Castro umwuzukuru w’uwahoze ari perezida Raúl Castro, misitiri Lázaro Álvarez Casas w’ubutegetsi bw’igihugu, n’umukuru w’inzego z’ubutasi za Cuba.
Kubura kw’ibikomoka kuri peteroli kubera ibihano byo gufungirwa na Amerika kwasize ibitaro mu gihugu bidakora mu buryo busanzwe naho amashuri n’ibiro byinshi bya leta birafunga.
Mbere, ikirwa cya Cuba cyari kibeshejweho na lisansi na mazutu biva muri Venezuela na Mexique, ariko ibi bihugu byombi byategetswe na Amerika guhagarika guha Cuba ibikomoka kuri peteroli cyangwa bigafatirwa ibihano.
