Inyeshyamba z’umutwe wa FDLR urwanya ubutegetsi bw’u Rwanda ukorera mu burasirazuba bwa Congo uravugwa gucengera mu gace ka Bambo kuri uyu wa Mbere zikica umuturage w’imyaka 77 zigashimuta abandi mu gihe drones zakomeje kwibasira ibice bituwe cyane i Minembwe.
Ibi byatangajwe n’Ihuriro rys AFC/M23 rirwanya ubutegetsi bwa Kinshasa mu itanhazo ryashyizwe ahagaragara kuri uyu wa Mbere
Iri tangazo rivuga ko “Kuva ku Cyumweru, itariki ya 17 Gicurasi 2026 saa 20h30, kugeza kuwa Mbere, itariki ya 18 Gicurasi 2026, kugeza saa mbiri n’igice za mu gitondo, ingabo z’ihuriro ry’ubutegetsi bwa Kinshasa zagabye igitero icyarimwe ku turere dutuwe cyane twa Gakenke, Mikenke, na Rugezi mu misozi ya Minembwe”.
Itangazo rivuga ko ibisasu byatewe hifashishijwe indege zitagira abapilote za KT-6 na drone za kamikaze, byibasira nkana abaturage b’inzirakarengane.
Kuri uyu wa Mbere, itariki ya 18 Gicurasi 2026, saa 1h45 z’urukerera, abarwanyi ba FDLR binjiye mu mujyi wa Bambo, cyane cyane mu gace ka Kabanda, aho bishe umuturage witwa Nzirorera Nsekuye, ufite imyaka 77.
Aba barwanyi kandi bashimuse abandi baturage babiri, ari bo; Munenge Samuel na Karuhije Innocent, mu gace ka Kabuye.
AFC / M23 ivuga ko guceceka kw’amahanga gukomeje kuri ibyo bikorwa bidakwiye kwihanganirwa kandi yongera gushimangira ko yiyemeje bidasubirwaho kurengera no kurinda abaturage n’ibyabo.
