Perezida Paul Kagame yashimiye ikipe ya Arsenal, nyuma yo gutwara igikombe cya shampiyona y’Abongereza yaherukaga mu myaka 22 ishize.
Arsenal bizwi ko ari yo kipe Perezida Paul Kagame afana, ikindi imaze imyaka umunani ikorana n’u Rwanda biciye muri gahunda ya Visit Rwanda.
Iyi kipe y’i Londres yegukanye Premier League yaherukaga mu mwaka w’imikino wa 2003/2004, nyuma y’uko Manchester City bari bahataniye igikombe yananiwe gutsinda AFC Bournemouth bakagwa miswi igitego 1-1.
Kagame abinyujije ku rubuga rwe rwa X, yagize ati: “Felisitasiyo kuri Arsenal, umufatanyabikorwa wacu wa Visit Rwanda ku kuba yegukanye igikombe cya shampiyona y’Abongereza nyuma y’umwaka w’imikino wo kurwana bikomeye. Ni igikombe yari ikwiriye!”
Kunganya na Bournemouth byatumye Manchester City igira amanota 78, irushwa na Arsenal amanota ane.
Ni mu gihe umukino umwe wa shampiyona usigaye n’ubwo City yawutsinda itageza kuri ariya manota Arsenal ifite.
