Muri Nigeria, uwahoze ari jenerali mu gisirikare cy’igihugu yapfiriye aho yari yarafatiwe bugwate, nk’uko byatangajwe n’ibitangazamakuru byaho.
Abubakar yashimutanwe n’umugore we muri Leta ya Katsina mu byumweru bibiri bishize, bashimuswe n’abantu bitwaje imbunda bakekwaho kuba mu mutwe ushimuta abantu kubw’ingurane, uzwi ku izina rya “bandits” cyangwa amabandi.
Ibyo guverinoma yavuze
Uyu mujenerali wahoze ari umuvugizi w’ingabo z’igihugu yapfuye azize ibibazo bijyanye na diyabete n’umuvuduko w’amaraso, nk’uko byatangajwe na guverinoma mu itangazo ryasohowe na Minisiteri y’umutekano w’imbere mu gihugu.
Iri tangazo rivuga ko “nubwo hashyizwemo ingufu kugira ngo arekurwe mu mahoro, ibintu byarangiye muri aya makuba.”
Ibiro ntaramakuru AFP byatangarijwe n’umwe mu bakora mu nzego z’umutekano ufite amakuru ko Abubakar n’umugore we bari bagiye mu bukwe kandi ko bategewe mu nzira ubwo bashimutwaga.
Ikinyamakuru Punch cyo muri Nigeria cyatangaje mu cyumweru gishize ko abashimuse basabye irekurwa ry’abarwanyi batatu bafunzwe ndetse no gusubiza amatungo yafashwe mu mukwabu w’abashinzwe umutekano kugirango barekure abashakanye bashimuswe.
