Umwe mu basirikare bakuru mu mutwe wa FDLR, ufite ipeti rya Major aherutse kuri uyu gufata icyemezo cyo kwishyikiriza urwego rushinzwe gusubiza abahoze ari abarwanyi mu buzima busanzwe muri Monusco ruzwi mu magambo ahinnye y’Igifaransa nka DDRRR ahitwa Sange muri Kivu y’Amajyepfo.
Ishami rishinzwe gutanga amakuru rya Monusco rikaba ryatanze aya makuru kuri uyu wa Gatandatu mu itangazo ryaciye kuri Radio Okapi. Iryo tangazo rikaba rivuga ko uyu murwanyi yahise asaba guhita acyurwa mu Rwanda.
Nyuma yo gusuzuma, Monusco irakeka ko uyu murwanyi ashobora kuba ari uwitwa Major Rafiki Castro Yacinthe, ushinjwa ibyaha bitandukanye bikomeye byibasiye inyokomuntu no kugira uruhare mu bwicanyi bwakorewe abasivili kkuwa 14 Gicurasi 2012 ahitwa Kamananga muri Kivu y’Amajyepfo.
Ku busabe bwa minisiteri y’ubutabera ya congo, Monusco yahise imutwara kuri uyu wa Gatanu ushize I Bukavu aho yashyikirijwe abashinzwe ubutabera mu gisirikare cya Congo.
Ku busabe bw’umugenzuzi mukuru na none, Monusco yatanze amakuru yabonetse mu iperereza ry’ibanze ku bwicanyi bwabereye aha I Kamananga, ndetse no ku bindi byaha byibasiye inyokomuntu mu rwego rwo gufasha mu iperereza ry’ubucamanza.
Iyi nkuru isoza ivuga ko iyi nyeshyamba nkuru y’Umunyarwanda yishyikirije Monusco umunsi umwe nyuma y’aho FARDC na none itereye muri yombi abarwanyi 12 b’imitwe ya “John Love” na “FDLR” ndetse hagafatwa n’abo mu miryango yabo ahitwa kanyati muri Bwito ho muri Kivu y’Amajyaruguru. Ese uyu waba ari umusaruro w’ibiganiro perezida Kagame aherutse kugirana na perezida Kabila? Tubitege amaso.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
Â
