“ Murekere aho kwivanga ”, “ Oya ku kwivanga ”, “ Abarundi dushoboye gucyemura ibibazo byacu tudasabye ubufasha hanze ”, “ Twamaganye umwanzuro 2303 w’Akanama k’umutekano ka Loni ”, “ Ntidukeneye abapolisi ba Loni, amahoro arahinda ”, “ Oya ku birego bya jenoside ”; ibyo ni bimwe mu byo Abarundi bigaragambyaga kuri uyu wa Gatandatu, itariki 03 Nzeri i Bujumbura bagendaga baririmba.
Aba baturage bari baturutse mu ntara zitandukanye z’u Burundi, baririmbaga indirimbo zamagana icyo bise kwivanga kw’Umuryango Mpuzamahanga no gushinja u Burundi gukora jenoside. Itangazamakuru naryo ryibasiwe, aho baribwiye ko bamaganye gutangariza Abarundi ubutumwa rutwitsi n’ibinyoma.
Abasenateri, abadepite, abajyanama muri perezidansi no muri visi perezidansi uko ari ari ebyiri, nibo batangije uru rugendo rwiswe urw’amahoro.
Abagore amagana bari bahuriye ku cyicaro cy’Umuryango w’Abibumbye, aho bivugwa ko urugendo rwatangiye nka saa tatu za mugitondo. Aba rero bakaba bagendaga baririmba indirimbo zitandukanye harimo n’iyo baririmbye bishongora ku Muryango Mpuzamahanga bagira bati: “Tuboherereza ibihumbi by’abapolisi, none barashaka kutwoherereza ijana”.
Mu ijambo yavugiye ku rubuga rwitiriwe ubwigenge nk’uko ikinyamakuru Iwacu-Burundi dukesha iyi nkuru kivuga, ambasaderi Rose Ntawe yagarutse ku mpamvu y’uru rugendo rwakozwe, aho yavuze ko bateguye iyi myigaragambbyo yo mu mahoro mu rwego rwo kugaragariza amahanga ko ari ukuri amahoro ahari mu Burundi, no kwamagana imyanzuro bwafatiwe.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
