Ihuriro Article 64 (C64) riharanira kurengera itegeko nshinga ryagaragaje ko rihangayikishijwe cyane n’ibikorwa by’urugomo byiyongera kuri Kiliziya Gatolika muri Repubulika ya Demokarasi ya Congo.
Mu itangazo ryashyizwe ahagaragara ku wa 22 Kamena 2026, uru rubuga rwa politiki rwamaganye ibitero byibasiye inyubako nyinshi z’idini ndetse n’ibikorwa by’iterabwoba byibasira abagize ubuyobozi bwa kiliziya.
Nk’uko C64 ibivuga, ibi bintu byagaragaye cyane cyane i Kananga, Luebo, na Kinshasa, ni ihonyora rikabije ry’uburenganzira bwa muntu, ubwisanzure bw’idini, ndetse n’ahantu ho gusengera, byemewe n’Itegeko Nshinga rya Congo nk’uko inkuru dukesha mediacongo.net ivuga.
Ihuriro ry’abanyamuryango barimo Martin Fayulu, Jean-Marc Kabund, Moïse Katumbi, Augustin Matata Ponyo, na Delly Sesanga, ryemeza ko nta muturage ugomba kwibasirwa kubera imyizerere ye, ubutumwa bwe mu by’umwuka, cyangwa kubera uko abona ibintu.
Iri huriro rya politiki riremeza ko ibyo bitero bibaye mu gihe hakomeje kwiyongera urugomo, imvugo zibiba inzangano, guhamagarira rubanda ubwicanyi, no gutera ubwoba abatavuga rumwe n’ubutegetsi. Kuri C64, iki kibazo kigaragaza ko urugomo rushingiye kuri politiki rukoreshwa nk’uburyo bwo gukemura ibyo abantu batumvikanaho.
