Nyuma y’igihe yihishe hatazwi aho aherereye uwahoze ari umukuru w’igipolisi cya Uganda muri Kampala, ASP Aaron Baguma kuri uyu wa 06 Nzeri 2016 yagejejwe imbere y’Urukiko rwa Buganda ari kumwe na bagenzi be bakurikiranweho icyaha cy’ubwicanyi.
Uyu mugabo wari umaze iminsi ashakishwa, yageze mu rukiko mu mapingu nka saa tatu za mu gitondo yambaye ikoti risa nk’ivu n’umupira w’umweru. Yageze imbere y’umucamanza Jamson Karemani wahise amwohereza mu Rukiko Rukuru nyuma y’aho urukiko rubwiriwe ko iperereza ryarangiye. Mu gihe ategerejwe mu Rukiko Rukuru, ASP Baguma arakomeza gufungwa.
Baguma yari yabuze mu rukiko mu cyumweru gishize ku mpamvu z’uburwayi nk’uko byatangajwe na Jackson Musinguzi, umuyobozi muri gereza ya Kigo.
Aaron Baguma yahise ashinjwa uruhare m’urupfu rw’umucuruzikazi, Betty Donah Katusabe, nyuma yo kwishyikiriza urukiko mu ibanga nyuma y’igihe yarabuze.
Abandi bantu 8 areganwa nabo nk’uko iyi nkuru dukesha Daily Monitor ikomeza ivuga, ni: Muhammed Ssebuwufu (Ufite ikigo gicuruza amamodoka bivugwa ko nyakwigendera ari ho nyakwigendera yiciwe), Godfrey Kayiza, Philip Mirambe, Stephen Lwanga , Paul Tasingika, Yoweri Kitayimba, Shaban Otuddu na Damaseni Ssentongo .
Baguma rero ashinjwa kuba yararebereye akananirwa gutabara ubuzima bw’umuturage nk’uko byari biri mu nshingano ze, aho bivugwa ko yirengagije nyakwigendera wamusabye kumutabara ubwo yari amerewe nabi n’abamuhitanye.
Ubushinjacyaha buvuga ko nyakwigendera yicishijwe inkoni n’imipanga. Iyi nkuru kandi ivvuga ko usibye gushinjwa ubwicanyi bishobora kumukururira igihano gikuru ari cyo cy’urupfu akaba yamanikwa, Aaron baguma ngo anakurikiranweho icyaha cy’ubujura no gushimuta umuntu hagamijwe kumwivugana.
Icyaha cy’ubujura ashinjwa ngo kikaba ari ukwiba telephone y’uyu mugore wishwe ifite agaciro k’amashilingi ya Uganda 300,000.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
