Umupasiteri wo mu bwoko bw’Abanyamulenge, Jalos Nkunda Kilaya, yashimutiwe i Bujumbura n’abo bivugwa ko ari abakozi bakora mu Rwego rushinzwe iperereza ry’imbere mu Burundi (SNR), ubwo yari mu rugendo rujya i Kigali mu Rwanda.
Amakuru yakusanyijwe i Bujumbura aravuga ko Pasiteri Jalos Nkunda Kilaya yafashwe ku wa 8 Nzeri 2026, ku Kibuga Mpuzamahanga cy’Indege cya Melchior Ndadaye, ubwo yari agiye gufata indege imujyana mu Rwanda.
Amakuru aturuka mu gihugu avuga ko ifatwa rye ryakozwe riyobowe na Brigadier General Domitien Niyonkuru, ukuriye ubutasi bw’imbere mu gihugu muri Serivisi y’Igihugu y’Ubutasi (SNR).
Nyuma yo kumufata, inzego z’ubutasi zamujyanye iwe mu rugo kugira ngo zihasake, nk’uko ayo makuru akomeza abivuga.
Impamvu nyayo y’ifatwa rye ntiratangazwa ku mugaragaro. Hari amakuru avuga ko yaba yarafashwe kubera ko yari afite pasiporo y’u Rwanda. BWIZA ntiyabashije kugenzura mu buryo bwigenga aya makuru.
SOS Media Burundi dukesha iyi nkuru ivuga ko yuma y’iminsi ibiri Pasiteri Nkunda ashimuswe, ku wa 10 Nzeri 2026, abandi Banyamulenge bafatiwe i Bujumbura barimo: Pasiteri Gédéon Nzayitegaho, uyobora Urusengero rwa Carmel ruherereye mu gace ka Mutakura, mu majyaruguru ya Bujumbura.
Ubuhamya bwakusanyijwe i Bujumbura bubivuga, Pasiteri Nzayitegaho yafatiwe mu rusengero rwe, ku muhanda wa 7 i Mutakura ubwo yari imbere y’abakirisitu.
Abo batangabuhamya bavuga ko abakozi b’ubutasi bahise bamujyana ku cyicaro cya SNR, hafi ya Katederali Regina Mundi. Aha hantu hakunze kuvugwa n’imiryango iharanira uburenganzira bwa muntu ndetse n’abavandimwe b’abafunzwe nk’ahantu hagiye hatangazwa amakuru y’ibikorwa by’iyicarubozo n’ihohoterwa rikorerwa imfungwa.
Abavandimwe be bavuga ko nta mpamvu y’ifatwa rye yatangajwe ku muryango we ku mugaragaro. Kuva yafatwa, umuryango we uvuga ko utaremewe kumusura, kandi ko nta makuru ahagije ufite ku buzima bwe cyangwa ku byaha yaba akurikiranweho.
Pasiteri Mark Ntayoberwa wo mu Itorero Cornerstone, kimwe na Murama Gatonzi, na bo bari mu bantu batawe muri yombi muri icyo gihe.
Ku bijyanye na Murama Gatonzi, hari amakuru aturuka i Bujumbura avuga ko ikibazo cye gifitanye isano no gutanga ibyangombwa by’abinjira n’abasohoka bivugwa ko byatanzwe mu buryo bunyuranyije n’amategeko, nk’uko inzego zibishinzwe zibivuga.
Ibyo birego ntibiratangazwa ku mugaragaro cyangwa ngo byemezwe n’urwego rw’ubutabera. Ababiregwa bafatwa nk’abatari bahamwa n’icyaha. Ku bandi bantu batawe muri yombi, impamvu nyazo z’ifatwa ryabo nazo ntizirasobanuka neza.
Iki kibazo gikomeje gutera impungenge imiryango yabo. Abavandimwe babo benshi bavuga ko nta makuru ahagije bahawe ku hantu abafunzwe bari cyangwa ku buzima bwabo.
Umwe mu banyamakuru bo muri Congo ukurikirana ibibera mu burasirazuba bwa DRC yabwiye SOS Médias Burundi ati: “Iyo habaye igihombo ku rugamba, Abanyamulenge baribasirwa, cyangwa iyo habaye umwuka mubi hagati y’u Rwanda n’u Burundi.”
Iri tabwa muri yombi ryubuye mu gihe umwuka w’umwuka mubi hagati y’u Burundi n’u Rwanda ukomeje kwiyongera, ndetse n’intambara ikomeje kubera mu burasirazuba bwa Repubulika Iharanira Demokarasi ya Congo (DRC).
Mu Burundi, Abanyamulenge baboneka haba mu nkambi z’impunzi ndetse no mu mijyi irimo Bujumbura.
Mu minsi ishize, ingamba z’umutekano zigamije kugenzura bamwe mu Banyekongo zateje impungenge zihariye mu Banyamulenge. Ubwa mbere, igenzura n’ifatwa byibasiye Abanyamulenge bacuruzaga amafaranga y’amahanga (abavunjayi), nyuma nk’uko amakuru yakusanyijwe i Bujumbura abivuga, bigera no ku mpunzi z’Abanyekongo ziba mu mijyi.
