Perezida wa Leta Zunze Ubumwe z’Amerika, Donald Trump yatanze ikiganiro mu nama rusange y’Umuryango w’Abibumbye (UN) yateranye ku wa 22 Nzeri 2020, ageze ku Bushinwa asya atanzitse.
Mu kiganiro cyumvikanyemo kudaca ku ruhande no kutigengesera kwa Donald Trump, yanenze bikomeye Repubulika y’u Bushinwa ashinja kuzana icyorezo cya Covid-19 ku Isi.
Perezida Trump muri televiziyo yari imbere ya Perezida w’u Bushinwa, Xi Jinping, yongeye gushimangira ko icyorezo ari ‘Virus y’Abashinwa’, aho gukoresha izina rya ‘Covid-19.
Uyu Mukuru wa USA yagize ati: “Mu minsi ya mbere ya Virus, u Bushinwa bwafunze ingendo z’imbere ariko bwemerera ingendo z’indege kuva mu Bushinwa, zijya mu mahanga kwanduza Isi. U Bushinwa bwanenze ko nahagaritse ingendo zivayo, mu gihe bo bageze n’ubwo bafungirana abaturage mu ngo zabo.”
Ku bw’izi mpamvu, Trump yavuze ko “u Bushinwa bugomba kwirengera ingaruka zatewe n’iki cyorezo bwazituriye Isi.”
Gusa Perezida Xi we yavuze ko ibirego bya Perezida Trump kuri iki cyorezo gihangayikishije Isi, “nta shingiro bifite”. Yakomeje avuga ko bikwiye ko intambara y’ubutita ihagarara, ibihugu bigize Umuryango w’Abibumbye bigafatanya kurwanya iki cyorezo.
Icyorezo cya Covid-19 cyagaragaye bwa mbere mu mujyi wa Wuhan mu Bushinwa mu mpera z’2019, cyibasira ibihumbi birenga 80 by’Abashinwa ndetse gikwirakwira mu bihugu hafi ya byose biri ku Isi. Mu Bushinwa basa n’abagihashije burundu, ibihugu gikomereye cyane birimo USA, u Buhinde, Brazil, ibiri ku mugabane w’Afurika byo byategujwe ko bishobora kuzagerwaho n’ingaruka zacyo nyinshi mu bihe biri imbere.
Cyakuruye umwuka mubi hagati y’u Bushinwa na USA, cyane ko nka Trump atahwemye gushinja iki gihugu kiri ku mugabane wa Aziya kugikwirakwiza ku Isi ku bushake. Byatumye kandi USA yivana mu Muryango Mpuzamahanga wita ku buzima, OMS, iwushinja gukorera mu kwaha ku Bushinwa no kubufasha guhisha amakuru y’icyorezo; bikaba byaratumye gikwirakwira ku Isi yose.
