Inama y’Abakuru b’Ibihugu byo mu Karere yabaye_Amafoto

Abayitabiriye ni Perezida Paul Kagame w’u Rwanda, Perezida Yoweri Museveni wa Uganda, Perezida João Lourenço wa Angola na Perezida Tshisekedi wayitumije.

Perezida w’u Burundi, Evariste Ndayishimiye wari mu batumiwe, kuri uyu wa 6 Ukwakira 2020 ni bwo byamenyekanye ko atayitabira kuko ngo icyo ashyize imbere ari ibiganiro na RDC gusa.

Iyi nama yigaga ku ngingo zirimo umutekano, ubuzima, ubukungu n’ubucuruzi; ibaye yarabanje gusubikwa inshuro ebyiri bitewe n’impamvu zitandukanye. Ubwa mbere tariki ya 13 Nzeri, Guverinoma ya RDC yasobanuye ko byatewe n’imyiteguro y’inama y’Umuryango w’Abibumbye, ubwa kabiri tariki ya 20 Nzeri, isobanuro ko uburyo igomba kubamo bwahindutse, ikaba izifashisha ikoranabuhanga.

Ariko kandi humvikanyemo urwikekwe rwatumye bamwe muri aba Bakuru b’Ibihugu, banga guhurira mu mujyi wa Goma yagombaga kuberamo, bitewe n’uko ibihugu bayoboye bimaze imyaka mu makimbirane. Ngo iyi ngingo n’icyorezo cya Covid-19, biri mu mpamvu zatumye yimurirwa ku ikoranabuhanga.