Urwego rw’Igihugu rw’Ubugenzacyaha kuri uyu wa 9 Ukwakira 2020 rumaze gutangaza ko rwataye muri yombi Bakundinka Jean Nepomuscene wo mu Karere ka Gatsibo, ukekwaho kwica Mutuyimana Diogene akamutaba mu mwobo.
Nk’uko bigaragara mu itangazo rya RIB, Mutuyimana yishwe tariki ya 26 Nyakanga 2016. Icyo gihe ukekwa yaba yaramaze kumwica, amushyira mu mufuka, arangije amutaba mu mwobo iwe mu rugo.
Mu rugo kwa Bakundinka, ni mu Mudugudu w’Agatare, Akagari ka Nyagisozi, Umurenge wa Kageyo.
Bakundinka ukekwaho iki cyaha, ubu afungiwe kuri sitasiyo ya RIB ya Gatsibo, mu gihe akorerwa dosiye igomba gushyikirizwa ubugenzacyaha.
Ingingo y’107 y’itegeko No 68/2018 ryo ku wa 30/08/2018 riteganya ibyaha n’ibihano muri rusange, ivuga ko umuntu wica undi abishaka, aba akoze icyaha. Iyi agihamijwe n’urukiko, ahanishwa igifungo cya burundu.
