Umuganga wa White House yavuze ko Perezida wa Leta Zunze Ubumwe za Amerika, Donald Trump atakiri mu byago byo kwanduza abandi icyorezo cya Covid-19, mu gihe uyu yigamba kugira ubudahangarwa kuri iki cyorezo.
Hari impungenge z’uko ashobora kuba yakwanduza nyuma yo kumara iminsi itatu mu bitaro. Icyakora, itangazo ry’umuganga wa White House, Dr Sean Conley, ntiryigeze rivuga niba Perezida Trump yarapimwe bagasanga atagifite Covid-19.
Kuri iki Cyumweru, asubiza ibibazo bya televiziyo ya Fox News, Perezida wa Leta Zunze Ubumwe za Amerika, Donald Trump, yatangaje ko yumva ameze neza cyane kandi atakiri gufata imiti nyuma y’icyumweru kirenga afashwe n’icyorezo cya Covid-19.
Yagize ati: “Bisa nk’aho mfite ubudahangarwa ku ndwara, ahari bw’igihe kirekire, kigufi cyangwa ubuzima bwanjye bwose”.
Perezida wa Amerika avuga ko abaganga be bamubwiye ko nta bimenyetso agifite bya Covid-19 bisobanuye ko ntawe yakwanduza.
Ni mu gihe abantu basaga 214,600 bamaze kwicwa n’iki cyorezo muri iki gihugu, naho abasaga miliyoni 7,700,000 bamaze kwandura.
Dr. Sean Conley, kuwa Gatandatu yari yatangaje ko Perezida Trump yubahiriza ibisabwa n’ikigo gishinzwe kwirinda no gukumira indwara, CDC, kandi ko adashobora kwanduza abandi.
Uyu muganga akaba yaratangaje ko hashize amasaha arenga Perezida Trump nta bushyuhe bukabije afite.
