Nyuma y’ aho mu Burundi Gen. Adolphe Nshimirimana yiciwe, col. Bikomagu Jean akicwa ndetse n’ Umugaba Mukuru wa FDN Gen. Maj Prime Niyongabo akarusimbuka ntihagire igitangazwa, abantu batandukanye bakomeza kwibaza irengero rya Gen. Niyombare bikababera ihurizo.
Mu mpera z’ umwaka w’ i 2015, byagiye bivugwa ko Gen.Niyombare kimwe na Adolphe Nshimirimana na Col. Jean Bikomagu bose baba barishwe na Gen. Evaritse Nshimirimana ukora nk’ Umunyamabanga Mukuru wa CNDD/FDD iri ku ngoma mu Burundi uyu munsi.
Abatari bacye bakomeje kwibaza impamvu Gen. Godefroid Niyombare atagaragara ndetse bakanavuga ko yaba yarishwe ngo kuko atagaragara na gato mu bibazo bya politiki byugarije u Burundi mu gihe ari mu bantu batanze itangazo rivuga ko ashyigikiye ishingwa ry’ ihuriro CNARED.
Amayobera !
Mu nyandiko y’ umwe mu basomyi bacu uri mu Biyaga Bigali yatugezeho kuri uyu wa Gatatu taliki ya 14 Nzeli 2016 yagiraga iti:” Ndabasuhuje ndi n’ iteka ryo kubandikira mbasaba ko mwotubwira amakuru nyayo y’ urupfu rwa General Godfroid NIYOMBARE washatse guhirika ubutegetsi bwa Bujumbura, aho harI amakuru avuga ko yishwe arashwe Kuri uyu wa Kabiri tariki 6/9/2016, Igihe c’ isaha ndwi z’ ijoro muri Congo/ Brazavil mu misozi yamabuye yari yihishemwo n’ abagenzi biwe mwo dutohoreza mukaduha umuco kuko mwama muduha amakuru acukumbuye”!
Kuva taliki 13 Gicurasi 2015, ubwo umugambi wa Coup d’ Etat wapfubaga mu Burundi hagiye havugwa byinshi kuri Gen. Niyombare kuko hari amakuru yavugaga ko yahungiye muri Kenya, abandi bakemeza ko ari kumwe n’ ingabo ze mu ishyamba rya Kibiri ndetse na Leta ya Nkurunziza igakomeza gushinja u Rwanda gucumbikira uyu mu jenerali no gutoza ingabo ze.
Gen. Godefroid Niyombare yabaye umutoni wa Perezida Nkurunziza nk’ umuntu babanye mu ishyamba ariko umubano bari bafitanye watangiye gucumbagira ubwo yamugira inama yo kutaziyamamariza manda ya gatatu bikamuviramo no kwirukanwa ku mwanya w’ umukuru w’ inzego z’ iperereza z’ u Burundi.
Kanda hano ujye ubona amakuru yihuse kandi kugihe kuri Facebook no kuri twitter
Zamubandi Saido/Bwiza.com
