F-22 Raptor ni indege yakozwe n’uruganda rukora indege z’intambara rwa Lockheed Martin rwo muri Leta Zunze Ubumwe z’Amerika ku bufatanye na Boeing mu ishami rishinzwe indege za gisirikare, Space & Security n’igisirikare cyo mu kirere, USAF (United States Air Force); ikaba ikoranwe ikoranabuhanga rihambaye.
Mu myaka y’1980, igisirikare cya Leta Zunze Ubumwe cyagize igitekerezo cyo gukora indege y’intambara yabasha kurinda umutekano w’igihugu, ihashya umwanzi aho yaturuka hose ndetse zikoherezwa no mu butumwa ahashoboka hose.
Ni nyuma yo kubona ibihugu nka Leta Zunze Ubumwe z’Abasoviyete zari zimaze zikomeje gukataza mu ikoranabuhanga rya gisirikare, aho zari zimaze gukora indege zirimo nka SU-27 Flanker na MiG-29 Fulcrum.
Kugira ngo ruganda rwa Lockheed Martin rukore indege ya F-22 Raptor ku bufatanye n’ibindi bigo, byatwaye imyaka myinshi, nyuma y’igitekerezo ingabo za USA zari zaragije mu myaka y’1980 kuko iya mbere yakozwe mu 1996, igenda ivugururwa kugeza mu 2011.
Uruganda rwa Lockheed Martin rwemeza ko indege ya F-22 Raptor ari yo ndege y’intambara iganje izindi, ariko ko hari abakeba bakomeje gukora ibishoboka byose kugira ngo bakore izindi zifite ubushobozi burenze ubw’iyi ngiyi.
Uru ruganda rugira ruti: “Lockheed Martin izakorana n’igisirikare cyo mu kirere cya USA mu gukomeza kuzamura ubushobozi bwa F-22 bujyanye n’imirwanire. Ubushobozi bwa F-22 Raptor buracyari bwa bundi bwo guhashya ikibi cyatera, mu rwego rwo guharanira umutekano mu Karere no ku Isi.”
Incamake ku miterere ya F-22 Raptor
Nk’uko urubuga rwa Lockheed Martin rubitangaza, indege ifite uburebure (ubutambike) bwa metero 18.8, uburebure bujya hejuru bwa metero 5.09.
Iyi ndege irimo ubusa, ipima toni 19.5, yaba yuzuye (irimo intwaro n’ibiturika), igapima toni 29.4. Umuvuduko wo hejuru igenderaho ni ibilometero 2414 ku isaha.
