Leta ya Tanzaniya yatangaje ibihano byahawe amaradiyo abiri yari yafunzwe mu kwezi gushize azira gutangaza inkuru zitishimiwe n’ubutegetsi.
Radio 5FM ikorera Arusha na Magic FM ikorera Dar es Salaam zari zafunzwe mu mpera za Kanama 2016 zishinjwa gutangaza ibidafitiye umumaro rubanda, Kuwa gatanu Magic FM ikaba yarakomorewe kongera gukora ariko igasaba imbabazi perezida Magufuli n’abaturage.
Ikigo cya Tanzania gishinzwe kugenzura ibyitumanaho (TCRA) nicyo cyatangaje ibihano byahawe aya maradio yari yafunzwe mu kwezi gushize.
“Umwanzuro twafashe ni uwo kwihanangiriza bikomeye Radiyo Magic FM. Ikiyongeraho nuko igomba gusaba imbabazi perezida John Pombe Magufuli, abakunzi bayo n’abanyagihugu muri rusange mu minsi itatu ya mbere ikurikirana mu makuru ya mu gitondo uhereye kuri 17 Nzeri”.
Ku ruhande rwa radiyo 5FM byari byafungiwe rimwe ikorera Arusha, ubutegetsi bwategetse ko ikomeza gufungwa kugeza amezi atatu arangiye inategekwa kwishyura amande angana n’amadorali y’abanyamerika 2,300; hakiyongeraho kugenzurwa na leta mu gihe cy’umwaka wose.
Radio 5FM ishinjwa ko kuwa 17 Kanama 2016 yakiriye abatavugarumwe n’ubutegetsi bo mu ishyaka rya Chadema ikabaha umwanya wo kuvuga ibitagenda neza bakanenga perezida Magufuli.
Godbless Lema umwe mu banyamategeko ba Chadema yahawe umwanya anenga bikomeye ari nako abiba imbuto y’urwango mu benegihugu abasaba kwitabira imyigaragambyo itemewe na leta n’inzego z’umutekano, akabakangurira guhangana na police.
Aya maradiyo abiri yafunzwe kuwa 29 kanama 2016 na minisitiri w’itangazamakuru Mr Nape Nnauye ayashinja kurenga ku burenganzira bwo gutangaza amakuru mu gihugu.
Kuva perezida Magufuli yajya ku butegetsi mu Ugushyingo kwa 2016, ibinyamakuru 2 byamaze gufungwa burundu n’amaradioyo n’amateleviziyo byaciwe amande mu bihe bitandukanye, ndetse ibinyamakuru bishya 473 byangiwe gukora bishinjwa kumara imyaka itatu ikurikirana bidakora uko bikwiye.
Kanda hano ujye ubona amakuru yihuse kandi kugihe kuri Facebook no kuri twitter
Théogène U @Bwiza.com
