Umuyobozi ushinzwe ubuzima ku rwego rw’Akarere ka Arua muri Uganda, Paul Bishop Drileba, ari ku gitutu ashinjwa guha abayobozi ibyavuye mu bipimo bigaraza ko banduye icyorezo cya Covid-19 ubwo Perezida Museveni yagiriraga uruzinduko muri aka Karere, bamwe muri bo bagasanga bataranduye.
Mu ruzinduko rw’iminsi itanu Museveni yari afite muri Arua mu cyumweru gishize, abagombaga kwitabira inama ye bagombaga kubanza kwipimisha icyorezo cya Covid-19, abo bigaragaye ko ari bazima, bakemererwa.
Ibipimo byagaragaje ko mu bipimishije harimo 65 banduye Covid-19, barimo Alice Akello uyoboye muri Arua, Depite Buti Atima uhagarariye NRM muri Arua, Depite Bernard Atiku, Depite Maureen Osoru na Sam Nyakua nk’uko ikitangazamakuru The Observer cyabitangaje.
Osoru na Nyakua bo bahise bishyira mu kato gusa bafite amakenga kuri ibi bipimo bafashwe. Aba baketse ko byaba byakozwe bitewe na bamwe mu banyapolitiki. Akello we yavuze ko Drileba yamuhamagaye ku murongo wa telephone, akamubwira ko yanduye Covid-19 ariko ntamubwire amabwiriza agomba gukurikiza ajyanye n’iki cyorezo.
Akello yagize amakenga, Umuyobozi w’Ibitaro bya Arua amugira inama yo kongera kwipimisha. Yagiye kwipimisha muri Laborwatwari ya Adjumani, basanga nta Covid-19 arwaye.
Depite Atima na we yagiye kongera kwipimisha nyuma y’iminsi ibiri ahawe icyemezo cya Drileba kigaragaza ko yanduye Covid-19, bigaragara ko atanduye. Ngo yipimishije kandi hamwe n’abarimo we, na bo bigaragara ko batanduye iki cyorezo.
Observer ivuga ko hatigeze hashakishwa aba barahuye n’aba bantu 65 Drileba yagaragaje ko banduye Covid-19, we agasobanura nta bushobozi bwaba ubw’amafaranga bwabafasha muri iki gikorwa.
