Umudemokaratekazi, Ilhan Omar, umwe mu bagore ba mbere b’Abayisilamukazi binjiye mu Nteko Ishinga Amategeko ya Leta Zunze Ubumwe za Amerika, akaba n’umwimukira ukomoka muri Somalia, yatsindiye manda ya kabiri nyuma yo gutsinda mu matora uwo bari bahanganiye guhagararira Minnesota, umunyemari w’umwirabura w’Umunyamerika, Lacy Johnson wo mu ishyaka ry’Abarepubulikani.
Ilhan Omar yamutsinze ku majwi 64,6%, mu gihe Johnson yagize 25,9% mu Karere ka Minnesota kiganjemo Abademokarate. Ni mu gihe, Micheal Moore wo mu ishyaka riharanira uburenganzira bwo gukoresha urumogi (Legal Marijuana Now Party), yagize amajwi 9,5%.
Uyu mwimukira ukomoka muri Somalia, yatorewe bwa mbere kwinjira mu Nteko Ishinga Amategeko ya Leta Zunze Ubumwe za Amerika mu Ugushyingo 2018. Muri Mata 2019, yatangaje ko yatewe ubwoba kenshi mu buryo bunyuranye akangishwa kwicwa nyuma y’aho Perezida Trump akwirakwije amashusho amugaragaza atesha agaciro ibitero by’iterabwoba byo kuwa 11 Nzeri 2001.
Yongeye kandi kutavugwaho rumwe cyane nyuma yo kunenga uruhare rwa Israel muri politiki mpuzamahanga ya Leta Zunze Ubumwe za Amerika.
Omar kandi ari mu itsinda ry’abagore b’abadepite bahuje ibitekerezo bazwi nka “The Squad” bashimirwa kutarya iminwa imbere y’imiyoborere ya Washington kuva yatangira imirimo muri Mutarama 2019.
Aba bagore bagize iri tsinda, Ayanna Pressley, uhagarariye Massachusetts, Ilhan Omar uhagarariye Minnesota, Alexandria Ocasio-Cortez, uhagarariye New York, bose bamaze gutsindira manda ya kabiri ndetse mugenzi wabo Rashida Tlaib nawe afite icyizere cyo gutsinda.
