Guillaume Soro, wahoze ari umuyobozi w’inyeshyamba, kuri ubu akaba abarizwa mu ruhande rutavuga rumwe n’ubutegetsi muri Cote d’Ivoire, yahamagariye ingabo z’iki gihugu guhaguruka zikigomeka ku butegetsi zigakuraho Perezida Allassane Ouattara wongeye gutsindira kuyobora iki gihugu ku majwi 94% nk’uko byemejwe na Komisiyo y’amatora.
Icyakora, abatavuga rumwe n’ubutegetsi bahakanye amajwi, bavuga ko icyifuzo cya Ouattara cyo kwiyamamariza manda ya gatatu cyarenze manda ebyiri zemewe n’amategeko kandi kibangamira inzira ya demokarasi mu gihugu.
Ibiro Ntaramakuru by’Abongereza, Reuters, bivuga ko kuri uyu wa gatatu, abapolisi bashinzwe kurwanya imyigarambyo bagose inzu y’abatavuga rumwe na Ouattara bakomeye ba Ouattara nyuma y’aho guverinoma ibashinje gushaka gushyiraho ubuyobozi bubangikanye n’uburiho mu rwego rwo kwamagana intsinzi yo ku wa Gatandatu.
Uku kutumvikana kwazamuye impungenge z’imidugararo ishobora kuvuka nk’iyo muri 2010-11 yabaye nyuma y’amatora ataravuzweho rumwe hagati ya Ouattara na Laurent Gbagbo wari ku butegetsi.
Guillaume Soro (iburyo ku ifoto ari kumwe na Ouattara) wayoboye inyeshyamba zagejeje Ouattara ku butegetsi muri iyo ntambara, ariko umubano we na perezida ukaba wifashe nabi, yashyize ahagaragara ubutumwa kuri Facebook mu ijoro ryo ku wa Gatatu ahamagarira ingabo kwiyunga kuri guverinoma itavuga rumwe n’ubutegetsi.
Ati: “Ndahindukirira ubu abashinzwe umutekano wacu no kuturinda. Ndabasaba kutumvira amategeko atemewe no kwiyunga ku Nama y’Igihugu y’Inzibacyuho.”
Yakomeje agira ati: “Ntidushobora, kubera ubwoba, kwemera igitugu muri Cote d’Ivoire cya Alassane Ouattara.”
Muri iki gihe cy’amatora yo muri uyu mwaka wa 2020, byibuze abantu barenga 40 biciwe mu bushyamirane hirya no hino.
