Paul Rusesabagina ukurikiranweho ibyaha 13 yasubiye imbere y’Urukiko Rwisumbuye rwa Nyarugenge kuri uyu wa 10 Ugushyingo 2020, asobanura ko umunyamategeko Me Gatera Gashabana yasigaranye, ari muri Tanzania.
Yabitangaje mu gusobanura impamvu agomba guhabwa ikindi gihe cyo kujuririra inyongera y’igifungo cy’agateganyo yakatiwe n’Urukiko rw’Ibanze rwa Kicukiro, bitewe n’uko nta banyamategeko bamwunganira afite.
Rusesabagina yasobanuye ko impamvu yatumye Me Gatera Gashabana ari muri Tanzania, ni uko ari mu rundi rubanza i Arusha kandi ngo mbere y’uko aza mu Rwanda, agomba kubanza kubahiriza amabwiriza yo kwirinda icyorezo cya Covid-19, aho ufite gahunda yo kujya mu mahanga abanza kwipimisha iki cyorezo no kujya mu kato nk’uko BBC yabitangaje.
Rusesabagina yaboneyeho gusaba urukiko ko yakwemererwa kujurira tariki ya 20 Ugushyingo 2020, kuko yizeye ko Me Gashabana azaba yarageze mu Rwanda.
Umucamanza yemereye Rusesabagina kujurira ku itariki yasabye kuko ataburana adafite umwunganira.
Intandaro y’ubukererwe ku bujurire bwa Rusesabagina ni uko Urugaga rw’Abavoka rwisubije abanyamategeko babiri; Me David Rugaza na Me Emelyne Nyembo bamwunganiraga.
