Donald Trump agiye gusiga yirukanye uwari minisitiri w’ingabo

Mu gihe asigaje amezi atageze kuri abiri ngo asohoke muri White House, Perezida Donald Trump asize yirukanye uwari minisitiri w’ingabo wa Leta Zunze Ubumwe za Amerika, Mark Esper.

Ibi Perezida Donald Trump yabitangaje kuri uyu wa Mbere, itariki 09 Ugushyingo abinyujije ku rukuta rwe rwa twitter.

Perezida Trump kandi yatangaje ko Christopher Miller, wari ukuriye Ikigo cy’Igihugu gishinzwe kurwanya Iterabwoba, ari we ugiye kuba minisitiri w’ingabo w’agateganyo.

I am pleased to announce that Christopher C. Miller, the highly respected Director of the National Counterterrorism Center (unanimously confirmed by the Senate), will be Acting Secretary of Defense, effective immediately..

— Donald J. Trump (@realDonaldTrump) November 9, 2020

Iyi nkuru dukesha VOA ishami rya Afurika iravuga ko Sena bitayorohera kwemeza minisitiri w’ingabo mushya mbere y’uko Trump ava ku mirimo ye muri Mutarama 2021.

Minisiteri y’ingabo y’iki gihugu ntacyo yahise itangaza kuri iki cyemezo, kimwe mu bya nyuma Trump agiye gufata mu gihe asigaje ku butegetsi.

Mark Esper, wari wahawe izi nshingano muri Nyakanga 2019, bivugwa ko n’ubundi yateganyaga kwegura cyangwa kweguzwa.

Mu cyumweru gishize, ibinyamakuru bitandukanye muri Amerika bikaba byari byatangaje ko yamaze gutegura ibaruwa yo kwegura.