Intambara ikomeje kumvikana hagati ya Guverinoma ya Ethiopia n’ishyaka TPLF riri u butegetsi mu Ntara ya Tigray yatangiye no kugira ingaruka ku gihugu cya Eritrea gishobora kuyivangamo nyuma y’aho hari ibisasu bikomeje kuva muri iyi ntara biraswa mu nkengero z’umurwa mukuru Asmara.
Ibinyamakuru bitandukanye muri Eritrea n’abahagarariye ibihugu byabo muri iki gihugu bavuze ko ibisasu bya rokete byarasiwe mu Ntara ya Tigray, iherereye mu majyaruguru ya Ethiopia byarenze umupaka bikagera mu murwa mukuru wa Eritrea.
Ibi biravugwa mu gihe ishyaka riri ku butegetsi muri leta ya Tigray, ihanganye na leta ya Ethiopia, ryari ryakangishije ko rizagaba igitero kuri Eritrea.
Tigray People’s Liberation Front (TPLF) yavuze ko ku wa gatanu yarashe ahantu habiri ho muri leta ya Amhara, imwe mu zindi leta zigize Ethiopia, ndetse iburira ko izagaba ibindi bitero.
Iyi nkuru dukesha BBC ivuga ko ubushyamirane hagati ya TPLF na leta ya Ethiopia bwarushijeho kwiyongera mu kwezi gushize.
Abakurikiranira hafi ibyaranze politike yo mu gihe cya vuba gishize muri aka karere, bari bararaguje umutwe ko intambara irimo gututumba ubwo Minisitiri w’intebe wa Ethiopia Abiy Ahmed yahindukaga inshuti y’umutegetsi w’umunyagitugu wa Eritrea, Isaias Afwerki.
Bivugwa ko abanyapolitike bari ku butegetsi muri Tigray, ari bo bamaze imyaka myinshi bategeka Ethiopia mbere y’uko Abiy Ahmed agera ku butegetsi mu 2018. Aba bategetsi ba Tigray kandi ni nabo bari ku butegetsi igihe Ethiopia yari iri mu ntambara na Eritrea kuva mu 1998 kugeza mu 2000 yahitanye ababarirwa mu bihumbi ijana.
Urubuga rw’amakuru Tesfa rwo muri Eritrea rwatangaje kuri Twitter ko ibisasu bibiri bya rokete byarasiwe mu karere kagenzurwa na TPLF muri Tigray byahushije ikibuga cy’indege bigwa mu nkengero y’umujyi.
Umuvugizi wa TPLF ariko mbere yaho yari yakangishije kugaba ibitero bya misile kuri Eritrea, ashinja ingabo za Eritrea kwambuka umupaka zikajya gushyigikira ingabo za Ethiopia mu ntambara zirwana na TPLF.
Leta ya Eritrea yahakanye kugira uruhare urwo ari rwo rwose muri iyo mirwano, ariko umunyamakuru wa BBC Will Ross avuga ko kuba hari amakuru y’imirwano ku mupaka, ndetse n’amakuru yuko abasirikare barimo kuvurirwa mu bitaro byo muri Eritrea, bica amarenga ko ibitandukanye n’ibyo Eritrea ivuga ari byo kuri.
