Ikigo cy’Igihugu cy’Imisoro n’Amahoro, RRA, kimaze gufata imodoka zigera kuri 34 z’Abanyarwanda baba mu Rwanda ariko zifite ibirango (plate numbers) byo mu mahanga.
Mu itangazo yashyize ahagaragara kuri uyu wa Gatanu ushize, RRA yavuze ko imodoka z’Abanyarwanda baba mu Rwanda zigomba kuba zifite ibirango byo mu Rwanda.
RRA ivuga ko nyinshi mu modoka yafashe ari iz’Abanyarwanda batuye mu turere twegereye Repubulika iharanira Demokarasi ya Congo bafite imodoka zitwarirwa iburyo zifite ibirango bya Congo.
Iperereza ryakozwe n’iki kigo gishinzwe imisoro n’amahoro ngo ryasanze hari imodoka zatumijwe hanze zigomba kujya muri Congo ariko ntizirenge ku butaka bw’u Rwanda.
Itangazo rikomeza rigira riti: “Izi modoka zatumijwe muri Aziya zari zarahawe uburenganzira bwo gutambuka kuva ku mupaka wa Rusumo kugera muri Congo, ariko abazitumiza mu mahanga babonye ko bizabagora kongera kwinjira mu Rwanda bafite imyirondoro y’Abanyekongo kubera gufunga imipaka kubera COVID-19, nk’uko umwe mu bafashwe na RRA kandi wagize uruhare muri ubu bucuruzi yabitangaje”.
Kubera izi mbogamizi, ba nyir’imodoka zitumizwa mu mahanga bahisemo noneho gusiga imodoka zitamenyerewe kandi zibujijwe mu Rwanda (zitwarirwa iburyo), bakabona amakarita yo kwinjira n’ibirango byo muri Congo mu gihe ibinyabiziga bitigeze byinjira muri Congo binyuranyije n’amabwiriza ya gasutamo.
RRA yagize ati: “Twasabye gasutamo n’inzego za Congo gushyira ingufu zikenewe no gukora andi maperereza kugira ngo iyi myitwarire mibi igira ingaruka mbi ku bihugu byombi ihagarare.”
Ikigo cy’igihugu cy’imisoro kivuga ko kuva izi modoka zibujijwe mu Rwanda, izafashwe zishobora gusubizwa muri Congo mu gihe zaba zujuje ibisabwa cyangwa zigasenywa.
Hagati aho, ukurikije agaciro ka gasutamo, imodoka zitumizwa mu mahanga zisabwa imisoro ya gasutamo (25%), Umusoro ku nyongeragaciro (18%), imisoro ku bicuruzwa (5%, 10% cyangwa 15%) bitewe n’imbaraga za moteri, Iterambere ry’Ibikorwa Remezo ( 1.5%), Umusoro wa Afurika Yunze Ubumwe (African Union Levy 0.2%), umusoro ufatirwa (5%) n’amafaranga yo kwiyandikisha atandukanye kuva ku 250.000 kugeza kuri 350.000.
