Dr. Tanga Odoi uyoboye Komisiyo y’Amatora mu ishyaka NRM riri ku butegetsi, yiyemereye ko yashyizeho abantu bahangana n’abakunzi ba Depite Robert Kyagulanyi uzwi nka Bobi Wine.
Abantu Dr. Tanga avuga ko yashyizeho ni bamwe mu bayoboke b’ishyaka rya NRM, abo ngo bakaba bagomba gukoma mu nkokora bikorwa byo kwiyamamaza avuga ko bikorwa na Bobi Wine, cyane ibyo ateganya mu mujyi wa Tororo.
Ati: “Ariko Bobi Wine na Amuriat biyemeje gukora ibihabanye n’itegeko, bakavuga ko polisi iri mu makosa. Turi hano n’itsinda ryanjye kugira ngo batinjira muri Tororo.”
Aba bantu bafasha Dr. Tanga guhangana n’abakunzi ba Bobi Wine biganjemo abamotari bitwaje amafoto ya Perezida Museveni uri mu biyamamariza umwanya w’Umukuru w’Igihugu.
Ni agashya kubona umuyoboke w’ishyaka rihanganye n’irindi, yiyemerera ko agiye gukoresha imbaraga mu kurwanya ibikorwa by’irindi. Iyi nshingano ihabwa gusa inzego z’umutekano nk’abapolisi n’abasirikare, mu gihe habaye ibidakurikije amategeko.
Gusa na none abakandida nka Bobi Wine na Patrick Amuriat muri ibi bikorwa byo kwiyamamaza, bashinje inzego z’umutekano kubabangamira ntibakore ibikorwa bateganyije uko bikwiye. Bavuga ko NRM ari yo ibiri inyuma.
