Igisasu cya misile cyambukiranya imigabane (ICBM) cyasenyewe mu kirere n’ikindi cyarasiwe mu bwato bw’intambara ku nshuro ya mbere mu igeregeza ryagenze neza kuri uyu wa Kabiri, nk’uko byemejwe n’Ikigo gishinzwe Ubwirinzi bwa Misile cyo muri Amerika (MDA).
Iki gisasu cyambukiranya imigabane cyarasiwe mu Birwa bya Marshall biherereye mu Nyanja ya Pasifika, hagati ya Hawaii na Philippines ahagana saa 12;50 am, kiza kurasirwa mu kirere n’indi misile yarashwe n’ubwato bw’intambara USS John Finn bwari mu nyanja.
Iki gisasu cyashenywe n’ikindi cyo mu bwoko bwa SM-3 Block IIA cyakorewe kurinda misile cyakozwe n’ikigo cya Raytheon Missiles & Defense ku bufatanye na Mitsubishi Heavy Industries yo mu Buyapani nk’uko itangazo rya MDA rikomeza rivuga.
Umuyobozi wungirije wa MDA, Admiral Jon Hill, yagize ati: “Iki cyari ikintu kidasanzwe kandi ni intambwe ikomeye kuri gahunda ya Aegis BMD SM-3 Block IIA. Twerekanye ko ubwato buriho Aegis BMD bufite misile ya SM-3 Block IIA bushobora gutsinda igipimo yo mu rwego rwa ICBM, iyi ikaba ari intambwe yo kumenya niba bishoboka mu rwego rwo kubaka uburyo bwo kurinda igihugu. ”
Bryan Rosselli, visi perezida ushinzwe ingamba z’ubwirinzi bwa misile muri Raytheon Missiles & Defense, yavuze ko iri gerageza ari irya mbere ry’ubu bwoko kandi ryerekanye ko Leta Zunze Ubumwe za Amerika zifite uburyo bwiza bwo kwirinda urwego rushya rw’ikibazo cyaturuka kure.
