Igihugu cya Ethiopia cyatangaje ko uwahoze ari visi perezida wa Sudani y’Epfo, Dr Riek Machar yemerewe kwinjira muri iki gihugu mu gihe gito gusa ariko atemerewe kuba yahaba igihe kuko ngo Ethiopia itazanezeza umuntu wese ukuriye umutwe witwaje ibirwanisho.
Mu kiganiro yagiranye n’urubuga rwa internet rukorera muri Leta Zunze Ubumwe za Amerika rukora amakuru kuri politiki mpuzamahanga, Minisitiri w’Intebe wa Ethiopia, Hailemariam Dessalgen yagize ati: “ Ntabwo dukeneye umuntu uyoboye urugamba hakoreshejwe intwaro muri Ethiopia .”
Kuri Hailemariam, ngo Machar, kuri ubu ubarizwa muri Sudani ariko akaba yarabaye muri Ethiopia kubw’impamvu z’intambara hagati y’abaturage yabaga iwabo, azemererwa gusa guca muri Ethiopia mu ngendo ze ariko atemerewe kuhaguma igihe kinini.
Mu mwaka ushize nk’uko urubuga Africanews dukesha iyi nkuru ruvuga, igihugu cya Ethiopia cyakiriye ibiganiro byari bigamije kurangiza intambara mu gihugu cy’igituranyi cya Sudani y’Epfo. Amasezerano y’amahoro yari agamije guhuza perezida Salva Kiir na Riek Machar ikaba yarashyizweho umukono I Addis Ababa muri Kanama umwaka ushize.
Machar ariko ngo byamutwaye amezi 8 kugirango asubire I Juba nyuma y’ibiganiro. Nyuma y’aho imirwano yongeye kubura hagati y’ingabo ze n’iza leta muri Nyakanga, Machar yongeye guhunga I Juba.
Riek Machar kandi nyuma yatangaje ko yari agiye kwicwa, aza guhungira muri Repubulika iharanira Demokarasi ya Congo mbere yo kuhavanwa ajyanwa I Khartoum muri Sudani. Perezida Salva Kiir akaba yarahise asimbuza Machar uwari minisitiri w’ubucukuzi bw’amabuye y’agaciro ku mwanya wa visi perezida.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
