Kuri uyu wa Gatanu, itariki 23 Nzeri 2016 Komisiyo y’Igihugu y’Ubumwe n’ubwiyunge, NURC, yagejeje ku Nteko ishinga Amategeko ibyavuye mu bushakashatsi ku bipimo by’ubumwe n’ubwiyunge mu Banyarwanda mu mwaka ushize wa 2015 (Rwanda Reconciliation Barometer 2015). Igipimo cy’ubumwe n’ubwiyunge mu Banyarwanda kikaba kigeze kuri 92% mu gihe cyari kuri 82,3% mu 2010.
Ubushakashatsi bwa mbere kuri ibi bipimo bizwi mu Cyongereza nka Rwanda Reconciliation Barometer , bwakozwe mu mwaka wa 2010.
Nk’uko byagaragajwe, akarere ka Musanze niko kaza imbere mu kurangwamo ingengabitekerezo ya jenoside, aho abaturage 79,2% bakirebana mu ndorerwamo z’amoko, mu gihe ingengabitekerezo ya jenoside ikomeje kugaragara ku kigero cya 78,9%.
Akarere ka Rubavu niko gakurikiraho na 74,4% by’abaturage bakirebana mu ndorerwamo z’amoko naho ingengabitekerezo ikaba ikomeje kugaragara muri aka karere ku kigero cya 77,3%.
Utu turere dukurikirwa na : Gasabo (69,5% hagaragara ingengabitekerezo), Nyarugenge (59,1%), Ruhango (44,4%), Nyanza (63,9%), Nyagatare (58,6%), n’utundi tugakurikira.
Zimwe mu mbogamizi zagaragajwe zikibangamiye ubumwe n’ubwiyunge bw’Abanyarwanda ugereranyije n’ibipimo biheruka byo mu 2010, harimo:
- Abanyarwanda bakirebera mu ndorerwamo z’amoko nubwo byagabanyutse, aho mu 2010 byari ku rugero rwa 30,5%, ibipimo bya 2015 bikaba bigaragaza ko bigeze ku rugero rwa 27,9%.
- Kuba ingengabitekerezo ya jenoside ikomeje kwigaragaza, mu 2010 ikaba yari ku rugero rwa 31,5% ariko ubu ikaba igeze ku rugero rwa 25.8%.
- Abanyarwanda bamwe bashobora kugerageza kongera gukora jenoside bibakundiye, aho mu 2010 ibi byagaragaraga ku rugero rwa 39,9%, kuri ubu bikaba bigeze ku rugero rwa 28,9%.
- Ibikomere by’ahashize haranzwe n’amacakubiri na jenoside, aho mu 2010 byabarirwaga ku rugero rwa 11,6% kuri ubu bikaba bigeze kuri 4,6%.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
