Amakipe ya Real Madrid yo muri Espagne na Inter Milan yo mu gihugu cy’Ubutaliyani, akomeje kujya mu mazi abira nyuma yo kwitwara nabi mu mikino y’amatsinda ya UEFA Champions league.
Mu ijoro ryakeye iyi mikino yari yakomeje kuva mu tsinda A kugeza mu rya D, hakinwa imikino ibanziriza iya nyuma y’amatsinda.
Ikipe ya Real Madrid ni yo yatunguranye muri iriya mikino, nyuma yo kwitwara nabi itsindwa na Shakhtar Donetsk yo muri Ukraine ibitego 2-0.
Ni ibitego byombi byinjiye mu gice cya kabiri cy’umukino bitsinzwe n’Umunya-BrĂ©sil Bruno Ferreira Bonfim bita Dentinho cyo kimwe n’Umunya-Israel Manor Solomon.
Muri iri tsinda rya B ikipe ya Inter Milan bigoranye, yagiye gutsindira Borussia Monchengradbach mu Budage ibitego 3-2, byatsinzwe na Matteo Darmian cyo kimwe na Romelu Lukaku watsinzemo ibitego bibiri.
Ibya ririya tsinda bizasobanuka ku munsi wa nyuma w’imikino y’amatsinda, kuko buri kipe igifite amahirwe yo gukomeza.
Ikipe ya Borussia Monchengradbach iyoboye itsinda B n’amanota umunani, Shakhtar Donetsk ni iya kabiri n’amanota arindwi inganya na Real Madrid, mu gihe Inter Milan ari iya nyuma n’amanota atanu.
Ku munsi wa nyuma Real Madrid izakira Borussia Monchengradbach i Santiago Bernabeu mu gihe Inter izakira Shakhtar i San Siro.
Ni imikino buri kipe iri muri ririya tsinda isabwa gutsinda, bitaba ibyo igasezererwa itarenze umutaru.
Mu yindi mikino ikomeye yaraye ibaye, ikipe ya Atletico Madrid yaguye miswi na Bayern Munich igitego 1-1, Liverpool itsinda Ajax igitego 1-0; mu gihe Olympique de Marseille yatsinze Olympiacos ibitego 2-1.
