Minisiteri y’Ibidukikije, Amashyamba n’Ubukerarugendo muri Namibia, tariki ya 2 Ukuboza 2020 yatangaje ko igiye kugurisha mu cyamunara inzovu 170.
Impamvu iki gihugu kigiye kuzigurisha nk’uko iyi Minisiteri yabitangaje ni uko umubare wazo ukomeje kwiyongera, zikabura ubwatsi maze zikajya konera abaturage imyaka; nabo bakazihimuraho bazihiga.
Kuzigurisha rero ni ukugira ngo iki gihugu kizasigarane umubare w’izo kizashobora kwitaho, ibibazo hagati yazo n’abaturage bikagabanyuka.
Abemerewe kujya mu cyamunara cyo kugura izi nzovu ni abaturage bo muri iki gihugu ndetse n’abanyamahanga bafite ibyangombwa byo korora inzovu.
Nk’uko Daily Nation yabitangaje, abaguzi b’abanyamahanga bazitabira iki cyamunara, bagomba kwitwaza icyemezo bahawe n’ikigo cy’igihugu baturutsemo, gishizwe kubungabunga ibidukikije, icyo kikazemeza ko mu gihe bazikuye muri Namibia, bazabasha kuzinjiza mu bihugu byabo.
Mu myaka 24 ishize, umubare w’inzovu muri Namibia wiyongereye mu buryo bugaragara; aho wavuye ku 7,500 mu 1995, ugera ku 24,000 mu 2019.
