Umuyobozi w’ikigo cy’igihugu cy’itangazamakuru (RBA) Arthur Asiimwe avuga ko byaba byiza Ikompanyi y’ubucuruzi itanga serivisi zo kugurisha amashusho ya startimes yakongera ururimi rw’ikinyarwanda muri gahunda zayo. Yabitangaje mu gikorwa cyabaye kuwa 26 Nzeri 2016 kigamije guteza imbere urwego rwa filimi, Televiziyo no kurushaho kumenyekanisha umuco w’abashinwa mu Rwanda.
Iyi gahunda yiswe ‘Beijing TV Drama & Movies Broadcasting season in Africa’ ni igikorwa iyi kompanyi ikomoka mu gihugu cy’u Bushinwa ikora kigamije gukwirakwiza umuco w’abashinwa muri Afurika. Ambasaderi w’u Bushinwa mu Rwanda Pan Hejun avuga ko ari n’uburyo bwo kurushaho gutsura umubano hagati y’ibihugu byombi.
Ambasaderi Pan Hejun agaruka ku kamaro ko kumurika amafilimi y’abashinwa, yagize ati, “ibi bizafasha mu guteza imbere ubufatanye hagati y’ibihugu byombi, yaba ku ruhande rw’u Rwanda ndetse n’u Bushinwa”. Yakomeje avuga ko bizanatanga amahirwe ku banyarwanda bashaka kwiga ururimi rw’igishinwa.
Ku bwa Arthur Asiimwe, ngo umubano w’u Rwanda n’u Bushinwa wateye imbere by’umwihariko kuva Startimes yatangira gukorera mu Rwanda, ikaba yarafashije mu buryo bukomeye mu guteza imbere uruganda rwa televiziyo mu Rwanda rukirwana no kwiyubaka.
Yagize ati, “umubano w’u Rwanda wabaye mwiza uhereye mu minsi ishize, nishimiye kubona Startimes ikorera mu Rwanda kuko yazanye byinshi. Iki gikorwa ni amahirwe yo kwiga kw’isoko rya televiziyo mu Rwanda rikiri rito.
Ku kuba mu ndimi zigera ku 10 ikoresha nta rurimi rw’ikinyarwanda rurimo, yagize ati; “Ni byiza ko tubona umubare wa televiziyo ziyongera, ariko byaba byiza kurushaho mugize uruhare mu gukora ibihangano nk’ibi bya filimi, imikino n’ibindi mu rurimi kavukire rw’ikinyarwanda nkuko mwabigenje mushyiramo igiswahili muri Kenya”.
Startimes yatangiye gukorera mu Rwanda kuwa 26 Kanama 2008 ifungurwa ku mugaragaro na perezida wa Repubulika y’u Rwanda Paul kagame. Zimwe mu ndimi ikoresha muri Afurika harimo icyongereza, igifaransa, igiswahili, igbo rukoreshwa muri Nigeria n’izindi; ikaba iteganya no kuzashyira ururimi rw’ikinyarwanda muri gahunda zayo mu minsi iri mbere.
Kanda hano ujye ubona amakuru yihuse kandi kugihe kuri Facebook no kuri twitter
Théogène U @Bwiza.com
