Abakinnyi bakiri bato ba Arsenal bagabanyije igitutu cyari kiri ku mutoza wabo Mikel Arteta, nyuma yo gutsinda Chelsea ibitego 3-1 kuri uyu wa Gatandatu.
Ni umukino Chelsea y’umutoza Frank Lampard yagiye gukina ishaka gukomeza urugamba rwo guharanira igikombe cya shampiyona, gusa iza gutungurwa n’urubyiruko rwa Arsenal yari imaze imikino irindwi itazi uko gutsinda muri shampiyona y’Abongereza bimera.
Umunota wa 34 w’umukino wari uhagije ngo Arsenal ifungure amazamu kuri Penaliti ya Alexandre Lacazette, nyuma y’ikosa Reece James yari amaze gukorera kuri Kieran Tierney.
Arsenal yatsinze igitego cya kabiri ku munota wa 44 ibifashijwemo na Coup-Franc y’akataraboneka ya Granit Xhaka, mbere y’uko Bukayo Saka atsinda igitego cya gatatu ku munota wa 56.
Chelsea yabonye impozamarira ku munota wa 85 ibifashijwemo na Tammy Abraham, nyuma gato y’uko Jorginho yari amaze guhusha penaliti yakuwemo n’umuzamu Bernd Leno.
Gutsinda Chelsea byatumye Arsenal yaherukaga kubona intsinzi tariki ya 1 Ugushyingo ifata umwanya wa 14 ku rutonde rwa Shampiyona, irushwa amanota umunani na Chelsea yahise imanuka ku mwanya wa gatandatu.
Ni Chelsea yashoboraga gufata umwanya wa kabiri mu gihe yari gutsinda uriya mukino.
