Minisitiri (Umunyamabanga) wa Leta ya Uganda mu biro bya Visi Perezida, Dr. Baltazar Kasirivu-Atwooki n’umurinzi we kuri uyu wa 13 Mutarama 2021, yarashweho n’abitwaje intwaro bataramenyekana.
Amakuru ya Daily Monitor avuga ko Dr. Kasirivu wari mu modoka mu bilometero bike agana ku rugo rwe, saa saba z’ijoro yageze ahitwa Kakora mu Karere ka Kakumiro, akagwa mu mutego w’abitwaje intwaro.
Aba bitwaje intwaro barashe amasasu agera mu munani ku modoka ye, ariko umushoferi akaba n’umurinzi we, yongera umuvuduko, barokora ubuzima bwabo batyo.
Dr. Kasirivu usanzwe ari Umudepite uhagarariye agace ka Bugangaizi, yagize ati: “Bari barangije ubuzima bwacu. Ubwo twari hafi yo mu rugo, ahantu h’igishanga, abantu tutazi bari bafite imbunda baturasheho. Nasabye umushoferi kwihuta, turokoka dutyo tudakomeretse.”
Yongeyeho ko uyu mutego waba ufitanye isano n’amatora y’Umukuru w’Igihugu ateganyijwe kuri uyu wa 14 Mutarama 2021.
